पुणे, ता. १६ : ‘तांत्रिक बिघाड झाला आहे, मी मदत करतो’ असे म्हणत चोरट्याने एटीएममधील तरुणाचे कार्ड आणि पासवर्ड घेऊन खात्यातून ४० हजार रुपयांची रोकड लंपास केली. ही घटना टिळक रस्त्यावरील एका खासगी बँकेच्या एटीएम केंद्रात घडली. या प्रकरणी खडक पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे.
धनकवडीतील बालाजीनगरमधील एक तरुण १४ जुलै रोजी दुपारी टिळक रस्त्यावरील बँकेच्या एटीएममध्ये पैसे काढण्यासाठी गेला होता. त्यावेळी एटीएम मशिनमध्ये रोकड न आल्याने तो गोंधळून गेला. याच संधीचा फायदा घेत पाठोपाठ एटीएममध्ये आलेल्या चोरट्याने मदतीच्या बहाण्याने तरुणाकडून त्याचे डेबिट कार्ड आणि पासवर्ड मिळवला. तांत्रिक बिघाड असल्याचे सांगत चोरट्याने तरुणाच्या हातातील कार्ड बदलून त्याला बोलण्यात गुंतवून पसार झाला. त्यानंतर चोरट्याने तरुणाच्या खात्यातून ४० हजार रुपये परस्पर काढले. याबाबत तरुणाने खडक पोलिस ठाण्यात तक्रार दिली.