पुणे, ता. १७ ः शहरातील ओढे व नाल्यांभोवती सीमाभिंती बांधण्यासाठी राज्य सरकारकडून निधी आलेला असताना, महापालिकेच्या अधिकाऱ्यांनी त्याची खातरजमा न करता सरकारची दिशाभूल करून निविदा रद्द केल्या. या प्रकरणात मलनिस्सारण विभागाच्या अधिकाऱ्यांनी जाणीवपूर्वक दिरंगाई केली आहे. त्यामुळे संबंधित विभागातील अधिकाऱ्यांची सखोल चौकशी करून कारवाई करावी, अशी मागणी स्थायी समितीच्या माजी अध्यक्ष अश्‍विनी कदम यांनी केली आहे.
आंबिल ओढ्याला पूर आल्यानंतर आंबिल ओढ्यासह शहरातील पर्वती, कोथरूड, खडकवासला, कॅन्टोन्मेंट व शिवाजीनगर विधानसभा मतदारसंघातील ओढे व नाल्यांभोवती सीमाभिंत बांधण्यासाठी राज्य सरकारने २०० कोटी रुपये मंजूर केले होते. मात्र संबंधित निधी महापालिकेस वेळेत मिळाला नव्हता. त्यामुळे या कामासाठीच्या निविदाप्रक्रिया महापालिकेने रद्द केल्या होत्या. दरम्यान, मागील आठवड्यात जिल्हाधिकारी कार्यालय प्रशासनाकडून महापालिकेस संबंधित कामासाठी २९ कोटी रुपये टप्प्याटप्प्याने आल्याचे पत्र पाठविण्यात आले. या कामासाठी निधी आल्याबद्दल जिल्हाधिकारी कार्यालयाकडून महापालिकेस विलंबाने सांगण्यात आले. या प्रकरणात महापालिकेच्या मलनिस्सारण विभागाकडून जाणीवपूर्वक दिरंगाई करणाऱ्या बेजबाबदार अधिकाऱ्यांची सखोल चौकशी करून कारवाई करावी, अशी मागणी कदम यांनी केली आहे.