पुणे, ता. १८ : राज्य सरकारने नुकतेच जनसुरक्षा विधेयक दोन्ही सभागृहांत मंजूर केले असले तरी, हा कायदा पूर्णपणे लोकशाहीविरोधी असून तो अभिव्यक्ती स्वातंत्र्यावर घाला आहे, असा आरोप करत भारतीय कम्युनिस्ट पक्षाने (मार्क्सवादी) राज्यभर जनजागृती आणि आंदोलनाची मोहीम उघडण्याचा निर्णय घेतला आहे, अशी माहिती भारतीय कम्युनिस्ट पक्षाचे (मार्क्सवादी) प्रदेश सचिव डॉ. अजित नवले आणि पुणे जिल्हा सचिव गणेश दराडे यांनी पत्रकार परिषदेत दिली.
या कायद्यात ‘बेकायदा कृत्य’ किंवा ‘कृती’ या संकल्पनांची व्याख्या मुद्दाम अस्पष्ट ठेवण्यात आली आहे. परिणामी, सरकारच्या विरोधात किंवा सरकारी धोरणांविरोधात बोललेले, लिहिलेले भाषण, सामाजिक माध्यमांवरील पोस्ट, व्यंग्यचित्र, कविता, कथा, हावभाव, प्रतिक्रिया, चिन्हे हे देखील ‘सार्वजनिक सुव्यवस्थेला बाधा आणणारे’ ठरवून असे कृत्य बेकायदा ठरविता येणार आहे. त्यामुळे लेखक, पत्रकार, कवी, सामाजिक आणि राजकीय कार्यकर्ते, साहित्यिक अशा अनेक घटकांच्या अभिव्यक्ती स्वातंत्र्यावर गदा येणार असल्याचे यावेळी सांगण्यात आले.
या पार्श्वभूमीवर भारतीय कम्युनिस्ट पक्षाकडून एक लाख नागरिकांची स्वाक्षरी मोहीम, प्रत्येक जिल्ह्यात मोर्चा, निदर्शने, आंदोलन करण्यात येणार आहे. या मोहिमेत विविध संस्था, संघटना, महाविकास आघाडीमधील घटक पक्षांनी सहभागी व्हावे, असे आवाहन पक्षातर्फे करण्यात आले आहे.
----------------