पुणे, ता. १८ ः महाराष्ट्र संघटित गुन्हेगारी नियंत्रण कायद्यानुसार (मकोका) पोलिसांनी केलेल्या कारवाईतील गुन्हेगाराने शुक्रवारी पहाटेच्या सुमारास सहकारनगर पोलिस ठाण्याच्या आवारात गोंधळ घालत पोलिसांच्या चेहऱ्यावर स्प्रे मारला. दरम्यान, संबंधित गुन्हेगारास पोलिस ठाण्यात आणल्यानंतर त्याने हातातील बेडीने पोलिस ठाण्यातील टेबलावरील काच फोडण्याचा प्रयत्न केला. त्यामध्ये त्याच्या हाताला दुखापत झाली.
पोलिसांनी दिलेल्या माहितीनुसार, हृषिकेश ऊर्फ बारक्‍या संजय लोंढे (वय २५) असे अटक केलेल्या सराईत गुन्हेगाराचे नाव आहे. लोंढे, मयूर आरडे याच्यासह आठ ते दहा साथीदारांनी तळजाई वसाहतीत दहशत माजवून वाहनांची तोडफोड केली होती. त्यामुळे तत्कालीन पोलिस आयुक्त रितेश कुमार यांनी लोंढे व त्याच्या साथीदारांविरुद्ध ‘मकोका’ कारवाई केली होती. लोंढे हा कारागृहात असताना त्यास जामीन मिळाला होता. त्यानंतर त्याने पुन्हा दहशत माजविण्यास सुरवात केली होती. दरम्यान, सहकारनगर पोलिसांकडून गुरुवारी रात्रीच्या सुमारास सराईत गुन्हेगारांची तपासणी करण्यात येत होती. त्यावेळी लोंढे हा त्याच्या घरात नशेत आढळला. पोलिसांनी त्यास ताब्यात घेण्याचा प्रयत्न केल्यानंतर त्याने पाण्यात मिरची पूड टाकून पोलिसांच्या अंगावर टाकली. तसेच पेपर स्प्रे पोलिसांच्या चेहऱ्यावर फवारला. या प्रकारानंतर पोलिसांनी त्यास पकडून सहकारनगर पोलिस ठाण्यात आणले. लोंढे आरडाओरडा करत पोलिसांना शिवीगाळ करत होता. त्यानंतर त्याने ठाणे अंमलदाराच्या टेबलावरील काचेवर बेड्या घातलेला हात आपटला. त्यामध्ये त्याच्या हाताला दुखापत झाली. सरकारी कामात अडथळा आणत पोलिसांना मारहाण केल्याप्रकरणी त्यास अटक केली असल्याची माहिती परिमंडळ दोनचे पोलिस उपायुक्त मिलिंद मोहिते यांनी दिली. दरम्यान, आरोपीस उपचारांसाठी रुग्णालयात दाखल करण्यात आले आहे. पोलिस निरीक्षक राहूल गौड यांच्या मार्गदर्शनाखाली सहकानगर पोलिसांकडून या प्रकरणाचा तपास केला जात आहे.

-------------------------------