पुणे, ता. १९ ः सौरऊर्जा आणि वीजसुरक्षा कार्यातील उल्लेखनीय योगदानासाठी ‘महावितरण’च्या मानव संसाधन विभागाचे उपकार्यकारी अभियंता डॉ. संतोष पाटणी यांना ज्येष्ठ साहित्यिक-समीक्षक डॉ. श्रीपाल सबनीस यांच्या हस्ते ‘ऊर्जाशील अभियंता पुरस्कारा’ने गौरविण्यात आले. मनोहर कोलते मैत्र संघातर्फे या कार्यक्रमाचे आयोजन करण्यात आले होते. या वेळी ‘महावितरण’च्या मुंबईतील मानव संसाधन विभागाचे संचालक राजेंद्र पवार यांची ग्रंथतुला झाली. ‘ऊर्जा व्यवस्थापन’ या विषयात मला सुरवातीपासून रुची होती. सौरऊर्जा क्षेत्रात कल्पकतेने प्रयोग राबवत ते सिद्धीस नेऊ शकलो, याचे समाधान आहे’, अशी भावना डॉ. पाटणी यांनी व्यक्त केली. मैत्र संघाचे प्रमुख मनोहर कोलते यांनी प्रास्ताविक केले. भागवत थेटे यांनी सूत्रसंचालन केले. पराग शिळीमकर यांनी आभार मानले.