पुणे, ता. १९ ः बँकॉकहून पुण्यात दाखल झालेल्या १९ दुर्मिळ वन्यजीवांची सर्व तपासणी करून, त्यांना पुन्हा त्यांच्या मायदेशात नेण्यात आले. ‘डीजीसीए’ची (नागरी विमान वाहतूक महासंचालनालय) परवानगी मिळताच, त्यांना घेऊन एअर इंडियाचे विमान (आयएक्स-२४२) शनिवारी सकाळी ८ वाजून ४६ मिनिटांनी बँकॉकसाठी झेपावले. बँकॉक येथील काही सामाजिक संस्था वन्य जिवांचा सांभाळ करणार आहेत.
बँकॉकहून बुधवारी दोन प्रवाशांनी आपल्यासोबत २० दुर्मिळ वन्यजीवांना फळांच्या बॉक्समध्ये लपवून पुण्यात आणले होते. त्यातील एका सापाचा प्रवासादरम्यान मृत्यू झाला होता. पुणे विमानतळावर सीमा शुल्क विभागाच्या अधिकाऱ्यांनी त्या प्रवाशांना पकडून त्यांच्याजवळचे वन्यजीव ताब्यात घेतले होते. त्यांना सुरक्षित ठिकाणी ठेवण्यात आले होते. गुरुवारपासूनच त्या वन्यजीवांना परत पाठविण्याची तयारी सुरु झाली. आवश्यक त्या सर्व विभागाकडून मंजुरीदेखील मिळाली, मात्र ‘डीजीसीए’ची परवानगी मिळणे शिल्लक होते. शनिवारी सकाळी परवानगी मिळताच बँकॉकला जाणाऱ्या विमानात प्राण्यांसाठी विशेष व्यवस्था करण्यात आली.

‘‘गेल्या काही दिवसांपासून वन्यप्राण्यांची तस्करी वाढली आहे. थायलंडहून भारतात दाखल होणाऱ्या विविध विमानात असा प्रकार घडलेला आहे. ही एक प्रकारची संघटित गुन्हेगारी आहे. पुणे हे अशा प्रकारच्या गुन्ह्याला व गुन्हेगारांना कदापि थारा देणार नाही, हा एक कडक संदेश देणे गरजेचे होते.
नेहा पंचमीया, संस्थापक व अध्यक्ष रेस्क्यू चॅरिटेबल ट्रस्ट, पुणे.