पुणे, ता. १९ : गेल्या आठवडाभरापासून पावसाचा जोर मंदावला आहे. परिणामी कमाल तापमानात देखील वाढ झाली आहे. पुढील तीन ते चार दिवसांत हवामानात फारसा बदल होणार नसल्याने कमाल तापमान स्थिर राहणार असल्याची शक्यता भारतीय हवामानशास्त्र विभागाने वर्तविली आहे.
शहर आणि परिसरात मंगळवारी पावसाने हजेरी लावली होती. त्यामुळे कमाल तापमान २६ अंश सेल्सिअस पर्यंत नोंदविण्यात आले होते. मात्र, त्यानंतर पावसाने विश्रांती घेतली आहे. परिणामी कमाल तापमानात पुन्हा मोठी वाढ नोंदविण्यात आली आहे. शनिवारी (ता. १९) शहरातील कमाल तापमान ३० अंश सेल्सिअस तर किमान तापमान २१. ८ अंश सेल्सिअस नोंदविण्यात आले. शहरात शनिवारी सकाळपासूनच ढगाळ वातावरण होते तर दुपारी कडक ऊन पडले होते. दुपारी साधारण एकच्या सुमारास हवामानात अचानक बदल होऊन हलक्या सरींनी हजेरी लावली. त्यामुळे उकाड्यापासून हैराण झालेल्या पुणेकरांना दिलासा मिळाला. तर हलक्या पावसामुळे वातावरणात गारवा निर्माण झाला होता.
पुणे आणि परिसरात रविवारी (ता. २०) कमाल तापमानात किंचित वाढ होणार असून, कमाल तापमान ३१ अंश सेल्सिअस इतके, तर किमान तापमान २३ अंश सेल्सिअस नोंदविण्यात येणार आहे. आकाश अंशतः ढगाळ राहणार असून, अति हलक्या ते हलक्या स्वरूपाचा पाऊस पडण्याची शक्यता आहे. तर सोमवारी (ता. २१) कमाल तापमान स्थिर राहणार असल्याची शक्यता आहे. कमाल तापमान ३१ अंश सेल्सिअसपर्यंत नोंदविण्यात येणार असून, आकाश अंशतः ढगाळ राहून अति हलक्या ते हलक्या स्वरूपाचा पाऊस पडण्याची शक्यता आहे.
-----------