पुणे, ता. २२ ः राष्ट्रीय महामार्ग प्राधिकरणाच्या वतीने चांदणी चौकात सुरू असलेले पादचारी पुलाचे काम सात महिन्यांपासून रखडले होते. ‘सकाळ’ने १८ जुलैच्या अंकात ‘पादचारी पुलाचा केवळ खांबाचा पाया’ अशी बातमी प्रसिद्ध केली. राष्ट्रीय महामार्ग प्राधिकरणाने बातमीची गंभीर दखल घेत एमडी इन्फ्रा कंपनीला दिरंगाईबाबत खडसावत उर्वरित कामे लवकर करण्याच्या सूचना दिल्या आहेत. त्यानुसार कंपनीने तत्काळ लोखंडी खांब व पुलाच्या कामास सुरुवात केली आहे. २२ फूट उंचीच्या १२ लोखंडी खांबावर हा पादचारी पूल असणार आहे. या खांबाच्या फॅब्रिकेशनचे काम आता प्रगतिपथावर आहे.
राष्ट्रीय महामार्ग प्राधिकरणाने पादचारी पुलाचे काम एमडी इन्फ्रा कंपनीला दिले आहे. सात महिन्यांपेक्षा जास्त कालावधीत केवळ खांबाच्या पायाचे काम झाले होते. तांत्रिक अडचणींचा पाढा वाचत या कंपनीने सात महिन्यांपेक्षा जास्त कालावधी वाया घालवला. ‘सकाळ’मध्ये बातमी प्रसिद्ध झाल्यानंतर राष्ट्रीय महामार्ग प्राधिकरणाच्या अधिकाऱ्यांनी पादचारी पुलाच्या ठिकाणी जाऊन कामाची पाहणी केली. सोमवारी एमडी इन्फ्रा कंपनीच्या अधिकाऱ्यांसोबत बैठक घेऊन काम वेगाने करण्याच्या सूचना दिल्या. १२५ मीटर लांबीचा व ६.६ मीटर रुंदीच्या पादचारी पुलासाठी सुमारे सात कोटी रुपयांचा खर्च अपेक्षित आहे. हा पूल पाषाण ते मुंबईच्या दिशेने असलेल्या बसथांबा दरम्यान बांधला जात आहे. पुलाच्या स्ट्रक्चरच्या कामालादेखील सुरुवात झाली आहे. महिनाभरात हे काम मार्गी लागणार असून, पादचारी पूल तयार होणार असल्याचे आश्वासन कंपनीने महामार्ग प्राधिकरणाला दिले आहे.

आधी चार महिने, आता महिनाभरात
‘सकाळ’मध्ये बातमी प्रसिद्ध होण्यापूर्वी पादचारी पुलास किमान चार महिन्यांचा कालावधी लागण्याची शक्यता ‘एमडी इन्फ्रा’च्या अधिकाऱ्यांनी व्यक्त केली होती. बातमी प्रसिद्ध झाल्यानंतर मात्र कंपनीच्या अधिकाऱ्यांचा सूर बदलला. राष्ट्रीय महामार्ग प्राधिकरणाच्या सूचनेनंतर आता कंपनीने महिन्यात हे काम पूर्ण करण्याचे आश्वासन दिले आहे.

अधिकाऱ्यांनी कामाची पाहणी करून संबंधित ठेकेदारांच्या कंपनीला काम वेगाने पूर्ण करण्याच्या सूचना देण्यात आल्या आहेत. त्यांना ज्या अडचणी येत आहेत, त्यावरदेखील तोडगा काढला जात आहे.
- संजय कदम, प्रकल्प संचालक, राष्ट्रीय महामार्ग प्राधिकरण, पुणे

पादचारी पुलाचे काम वेगाने पूर्ण करण्याच्या सूचना प्राप्त झाल्या आहेत. त्यानुसार आमच्या फॅब्रिकेशन यार्डमध्ये लोखंडी खांब व पुलाचे स्ट्रक्चरचे काम वेगाने सुरू आहे. महिनाभरात पादचारी पूल तयार होईल.
- अमोल भुरे, प्रकल्प व्यवस्थापक, एमडी इन्फ्रा, पुणे