पुणे, ता. २३ : ‘‘समाजाला व्यसनमुक्त करायचे असेल तर प्रतिबंध, पुनर्वसन, मानसिक आरोग्य समुपदेशन आणि धोरण वकिली या चतुःसूत्रींवर काम करणे गरजेचे आहे, तरच समाज व्यसनमुक्त होण्याच्या दिशेने एक पाऊल पुढे टाकेल,’’ असे मत मनोदय व्यसनमुक्ती संस्थेचे संचालक डॉ. विष्णू श्रीमंगले यांनी व्यक्त केले.

नवी पेठेतील एस. एम. जोशी हॉलमध्ये बुधवारी (ता. २३) मनोदय व्यसनमुक्ती संस्थेच्या वतीने गोलमेज परिषद पार पडली. या वेळी ते बोलत होते. कुटुंबातील नातेसंबंध, सकारात्मक संवाद, मैत्री, पालकांची पाल्यांसाठी उपलब्धता समजून घेणे आवश्यक आहे, तसेच शारीरिक, मानसिक, कौटुंबिक स्वास्थ्य राखत त्यावर काम करणे गरजेचे आहे, असेही ते म्‍हणाले.

या वेळी मनोदय संस्थेच्या वतीने प्रतिबंधात्मक उपाययोजना, मानसिक आरोग्य आणि समुपदेशन, पुनर्वसन केंद्र आणि धोरण वकिली या चार विषयांवर सविस्तर चर्चा करण्यात आली. संस्थेच्या विश्वस्त मालती गाडगीळ, रणजित गाडगीळ, व्यसनमुक्त महाराष्ट्र समन्वय मंचाचे अविनाश पाटील, जिज्ञासा मार्गदर्शन आणि समुपदेशन, ज्ञान प्रबोधिनी, मुक्तांगण व्यसनमुक्ती केंद्र आदी संस्थांचे प्रतिनिधी उपस्थित होते.
...............