सकाळ वृत्तसेवा
पुणे, ता. २५ : राज्यातील नगरपंचायत आणि नगरपरिषदांबरोबरच पुण्यात नव्याने अस्तित्वात आलेल्या फुरसुंगी आणि उरुळी देवाची नगरपरिषदेची निवडणूक होणार आहे. त्यासाठी प्रारूप प्रभाग रचना तयार करून नगरपरिषदेने जिल्हा प्रशासनाकडे सादर केली आहे. त्यानुसार या नगरपरिषदेत दोन वॉर्डांचा मिळून एक प्रभाग असे १६ प्रभाग असणार आहेत, तर ३२ नगरसेवक असणार आहेत.
फुरसुंगी आणि उरुळी देवाची ही दोन गावे २०१७ मध्ये पुणे महानगरपालिकेत समाविष्ट करण्यात आली. त्यानंतर येथे महापालिकेने आकारलेला कर जास्त असल्याने आणि कोणत्याही सुविधा मिळत नसल्याचा दावा करत या गावांनी महापालिकेतून वगळण्याची मागणी मुख्यमंत्री एकनाथ शिंदे यांच्याकडे ६ डिसेंबर २०२२ रोजी झालेल्या बैठकीत केली होती. त्यावर मुख्यमंत्री शिंदे यांनी फुरसुंगी, उरुळी देवाची ही गावे महापालिका हद्दीतून वगळण्याचे आणि या दोन गावांची स्वतंत्र नगरपालिका करण्याचे जाहीर केले होते. नगरविकास विभागाचे उपसचिव अनिरुद्ध जेवळीकर यांनी याबाबतची प्रारूप अधिसूचना ३१ मार्च २०२३ रोजी काढली होती. त्यावर जिल्हा प्रशासनाकडे साडेचार हजारांहून अधिक हरकती-सूचना प्राप्त झाल्या होत्या. प्राप्त हरकतींवर तत्कालीन जिल्हाधिकारी डॉ. राजेश देशमुख यांनी सुनावणी पूर्ण करून जून २०२३ मध्ये अभिप्रायासह आपला अहवाल राज्य सरकारकडे सादर केला. त्यावर मागील वर्षी राज्य सरकारने या नगरपरिषदेची स्थापना करण्यास अंतिम मान्यता दिली.
सर्वोच्च न्यायालयाच्या निकालानंतर राज्यातील स्थानिक स्वराज्य संस्थांच्या निवडणुकांची तयारी राज्य निवडणूक आयोगाकडून सुरू करण्यात आली. या निवडणुका चार टप्प्यांत घेण्यात येणार आहे. त्यासाठी प्रशासकीय तयार करण्याच्या सूचना आयोगाने दिल्या होत्या. त्यानुसार फुरसुंगी आणि उरुळी देवाची नगरपरिषदेच्या प्रशासनाने या गावांच्या निवडणुकांच्या दृष्टीने प्रारूप प्रभाग रचना करण्याचे काम हाती घेतले होते. प्रारूप प्रभाग रचनेचा आराखडा सादर करण्याची शुक्रवारी अंतिम मुदत होती. त्यानुसार नगरपरिषदेचे मुख्य अधिकारी प्रसाद शिंगटे यांनी तो जिल्हा प्रशासनाकडे सादर केला. यासंदर्भात शिंगटे यांच्याशी संपर्क साधला असता, त्यांनी यास दुजोरा दिला.

महत्त्वाचे
१) फुरसुंगी आणि उरुळी देवाची या दोन्ही गावांची २०११ मधील जनगणना ग्राह्य धरून प्रारूप प्रभाग रचना तयार
२) दोन वॉर्डांचा मिळून एक प्रभाग, त्यानुसार १६ प्रभाग
३) जिल्हा प्रशासनाकडून या प्रारूप प्रभाग रचनेची छाननी करण्यात येणार
४) त्यानंतर राज्य सरकारकडे, तर राज्य सरकारकडून तो अंतिम मान्यतेसाठी राज्य निवडणूक आयोगाकडे पाठविण्यात येणार

दृष्टिक्षेपात
दोन्ही गावांची मिळून २०११ मधील जनगणनेनुसार एकूण लोकसंख्या
सुमारे ७५ हजार

फुरसुंगी गावाची लोकसंख्या
६६ हजार ०२

उरुळी देवाची गावाची लोकसंख्या
९ हजार ४०३

ब वर्ग नगरपालिकेसाठी लोकसंख्येसाठीची अट
७५ हजार

एकूण प्रभाग
१६ (दोन वॉर्डांचा मिळून एक प्रभाग)

एकूण नगरसेवकांची संख्या
३२