पुणे, ता. २५ : शैक्षणिक वर्ष २०२५-२६ पासून ‘यु-डायस प्लस’ आणि ‘सरल’ या दोन्ही प्रणालींमधील माहितीचे एकत्रीकरण करण्याची कार्यवाही सुरू झाली आहे. या अंतर्गत ‘यु-डायस’ प्रणालीमध्ये नोंदविलेली विद्यार्थ्यांची माहिती ऑनलाइन पद्धतीने ‘सरल’ पोर्टलमध्ये समावेश करण्यात येणार आहे. त्यामुळे सातत्याने माहिती नोंदविण्याच्या प्रक्रियेचा शिक्षकांचा ताण कमी होणार आहे.

आता केवळ ‘यु-डायस प्लस’मध्ये शिक्षकांना माहिती भरायची असून, यासाठी ३० सप्टेंबरपर्यंत मुदत दिली आहे. यासंदर्भात महाराष्ट्र राज्य प्राथमिक शिक्षण परिषदेने परिपत्रक काढले आहे. केंद्र सरकारने शाळा, विद्यार्थी आणि शिक्षक यांच्या अद्ययावत माहितीसाठी ‘यु-डायस प्लस’ प्रणाली सुरू केली आहे. यात शाळेचा पत्ता, अभ्यासक्रम, पूर्वप्राथमिक वर्ग, भौतिक सुविधा, पीजीआय निर्देशांक, इंटरनेट सुविधांचा समावेश आहे. ‘यु-डायस प्लस’ आणि ‘सरल’ प्रणालीच्या एकत्रीकरणामुळे ‘यु-डायस’मधील माहिती ‘सरल’मध्ये समाविष्ट होणार आहे. यामुळे एकच माहिती सतत वेगवेगळ्या प्रणालींमध्ये भरण्यासाठी वाया जाणारा शिक्षकांचा वेळ आता वाचणार आहे. शाळांना ३० सप्टेंबरपर्यंत माहिती भरावी लागणार आहे. यात विद्यार्थ्यांची माहिती, दुसरी ते बारावीचे विद्यार्थी, पुनर्प्रवेशित विद्यार्थी, शाळा सोडलेले विद्यार्थी, दिव्यांग विद्यार्थी ही माहिती अद्ययावत करावी लागणार आहे, असे महाराष्ट्र प्राथमिक शिक्षण परिषदेचे राज्य प्रकल्प संचालक संजय यादव यांनी नमूद केले आहे.

विद्यार्थ्यांची माहिती ‘स्टुडंट’ पोर्टलवर भरण्याचे काम शिक्षकांना स्वतंत्रपणे करावे लागत होते. आता ‘यु-डायस’वरील माहिती ‘स्टुडंट’ पोर्टलसाठी वापरली जाणार असल्याने ही माहिती दोनदा भरण्याचा त्रास कमी झाला आहे. या निर्णयामुळे शिक्षकांवरील अतिरिक्त कामाचा ताण कमी होणार आहे. शासनाला देखील सर्व माहिती एकाच ठिकाणी सुलभरीत्या उपलब्ध होणार आहे.
- महेंद्र गणपुले, माजी उपाध्यक्ष, राज्य मुख्याध्यापक महामंडळ