पुणे, ता. २५ : खडकवासला मतदारसंघाच्या विधानसभा निवडणुकीतील मतदान यंत्रांची पडताळणी शुक्रवारी जिल्हा निवडणूक आयोगाकडून करण्यात आली. यात यंत्रे सुस्थितीत काम करत असल्याचा निर्वाळा उमेदवाराला देण्यात आला. मात्र, कंट्रोल युनिटच्या तपासणीनंतर करण्यात येणारे प्रतिरूप मतदान अर्थात मॉकपोल उमेदवाराने नाकारल्यामुळे करण्यात आले नाही, अशी माहिती उपजिल्हा निवडणूक अधिकारी मीनल कळसकर यांनी दिली.
हडपसर आणि खडकवासला मतदारसंघातील मतमोजणीत अनियमितता झाल्याच्या कारणावरून राष्ट्रवादी काँग्रेस शरदचंद्र पवार पक्षाकडून अनुक्रमे प्रशांत जगताप आणि सचिन दोडके यांनी जिल्हा निवडणूक शाखेकडे पडताळणीसाठी अर्ज केले होते. त्यासाठी निर्धारित शुल्कही भरले होते. त्यानंतर केंद्रीय निवडणूक आयोगाने खडकवासला मतदारसंघात यंत्रांची पडताळणी करण्याचे निर्देश दिले होते. त्यानुसार जिल्हा निवडणूक शाखेकडून शुक्रवारी ही पडताळणी करण्यात आली. दोडके यांनी या मतदारसंघातील दोन यंत्रांच्या पडताळणीसाठी शुल्क भरले होते. त्यानुसार या दोन कंट्रोल युनिटची भोसरी येथील निवडणूक शाखेच्या गोदामात पडताळणी करण्यात आली.
या वेळी उपजिल्हा निवडणूक अधिकारी मीनल कळसकर यांनी ही दोन्ही यंत्रे योग्यरीत्या सुरू असल्याचे दाखविले. त्यानंतर आयोगाच्या निर्देशानुसार करण्यात येणारे १ हजार ४०० मतांचे प्रतिरूप मतदान करण्यात आले नाही. दोडके यांनी याबाबत मतदानाची गरज नसल्याचे सांगितले. त्यानंतर मुख्य निवडणूक अधिकाऱ्यांशी चर्चा केल्यानंतर केवळ यंत्रांची पडताळणी करून दोडके यांचा अर्ज निकाली काढण्यात आला. मॉकपोलला नकार दिल्याने तो घेण्यात आला नाही, असेही कळसकर यांनी सांगितले.
-----------