पुणे, ता. २५ ः गोपाळकृष्ण गोखले रस्त्यावर (फर्ग्युसन महाविद्यालय रस्ता), बीएमसीसी महाविद्यालय रस्ता, आर्यभूषण पंपिंग स्टेशन, खंडोजी बाबा चौक आणि जंगली महाराज रस्ता येथील पदपथ अडवून अनधिकृतपणे कपडे, कटलरी, खेळणी, होजीअरीसह इतर वस्तू विक्री करणाऱ्या ७७ अनधिकृत व्यावसायिकांवर महापालिकेने गुरुवारी (ता. २४) रात्री अकरानंतर कारवाई केली.
यामध्ये अनधिकृतपणे व्यवसाय करत सिलिंडर वापरणाऱ्या विक्रेत्यांविरोधात तक्रारी प्राप्त झाल्या होत्या. तसेच रस्त्यावर बॉक्समध्ये कपडे आणून विक्री करणे, खाद्यपदार्थ विक्री करणे हे प्रकार रात्री बारानंतरही सुरु आहेत. यातील बहुतांश विक्रेते हे कोणताही परवाना नसताना व्यवसाय करत आहेत. त्याविरोधात नागरिकांच्या तक्रारी आल्या होत्या. अतिक्रमण विभागाचे उपायुक्त संदीप खलाटे यांच्या मार्गदर्शनाखाली, डेक्कन पोलिस ठाण्याच्या अधिकाऱ्यांच्या सहकाऱ्याने महापालिकेचे सहायक आयुक्त तिम्मया जंगले यांच्या नियंत्रणाखाली क्षेत्रीय अतिक्रमण निरीक्षक संजय कुंभार आणि सहायक निरीक्षक रवी जाधव, शरद पवार, भरत बिरादार यांच्या पथकाने ही कारवाई केली.
या कारवाईमध्ये बावीस कपड्यांच्या पथारी, एकवीस गॅस सिलिंडर, पंचवीस इतर प्रकारचे साहित्य, नऊ शेड जप्त करण्यात आले.
या मोहिमेत महाराष्ट्र सुरक्षा बलाचे सहा जवान, दहा बिगारी सेवक, एक ट्रक व एक पिंजरा सहभागी होता.
या परिसरात वारंवार कारवाई केली जाईल, अनधिकृत व्यावसायिकांनी रस्ते व पदपथ अडवू नये, असे आवाहन उपायुक्त संदीप खलाटे यांनी केले आहे.

राजकीय पुढाऱ्यांचे अभय
गोखले रस्त्यावर संध्याकाळपासून ते रात्री एक दीडपर्यंत अनधिकृत पथारी व्यावसायिक दुकान थाटत आहेत. त्यांच्यामुळे पदपथावर चालण्यासाठी जागाही शिल्लक नसते. पण या भागातील गुन्हेगारीची संबंधित असलेल्या राजकीय पुढाऱ्यांमुळे व त्यांच्या कार्यकर्त्यांच्या दादागिरीमुळे महापालिका कारवाई करण्यास टाळाटाळ करत आहे, असा आरोप नागरिकांनी केला.