पुणे, ता. २६ : शहरात गेल्या दोन दिवसांपासून सुरू असलेल्या पावसाने शनिवारी (ता. २६) उपस्थिती नोंदवली. पुढील दोन दिवसांत हवामानात फारसा बदल होणार नसल्याने हलक्या ते मध्यम स्वरूपाच्या पावसाची शक्यता भारतीय हवामानशास्त्र विभागाने वर्तविली आहे. घाट विभागात मात्र पावसाचा जोर कायम राहणार असल्याने रविवारी (ता. २७) ऑरेंज अलर्ट देण्यात आला आहे.
शहर आणि परिसरात सकाळी आठच्या सुमारास पडलेल्या संततधारेमुळे कामावर जाणाऱ्या नागरिकांची चांगलीच तारांबळ उडाली. शहरातील प्रमुख रस्त्यांवर वाहतूक कोंडी निर्माण झाली होती. त्यामुळे नागरिकांना मोठा मनस्ताप सहन करावा लागला. शनिवारी शहरात कमाल तापमानात किंचित घट झाली.
दरम्यान, गेल्या २४ तासांत ताम्हिणी परिसरात २५० मिलिमीटर पावसाची नोंद झाली आहे, तर इतर भागात १५० मिलीमीटरहून अधिक पाऊस पडल्याची माहिती आहे. यामुळे घाट विभागात रविवारी (ता. २७) ‘ऑरेंज’ अलर्ट देण्यात आला आहे. येत्या दोन दिवसांत घाटमाथ्यावर तुरळक ठिकाणी खूप जोरदार पावसाची शक्यता हवामान विभागाने वर्तवली आहे.
पुणे आणि परिसरात रविवारी (ता. २७) कमाल तापमान स्थिर राहणार असून, कमाल तापमान २६ अंश सेल्सिअस इतके तर किमान तापमान २२ अंश सेल्सिअस इतके नोंदविण्यात येणार आहे. आकाश अंशतः ढगाळ राहणार असून हलक्या ते मध्यम स्वरूपाचा पाऊस पडण्याची शक्यता आहे. सोमवारी (ता. २८) कमाल तापमानात किंचित वाढ होण्याची शक्यता आहे.
-----------