पुणे, ता. २७ ः ठरवून दिलेल्या कंपनीला मालाची विक्री न करता पदाचा गैरवापर करत ‘सॉफ्टहार्ट ऑटोमेशन कंपनी प्रा. लि.’ची फसवणूक केल्याप्रकरणी सात आरोपींच्या विरोधात नुकतेच दोषारोपपत्र दाखल करण्यात आले आहे. आरोपींनी कंपनीची एकूण ८० लाख रुपयांची फसवणूक केल्याचे तपासातून स्पष्ट झाले आहे.
कंपनीच्या विक्री विभागातील माधव कल्याण जगताप (वय ३६), धनश्री माधव जगताप (वय ३३, दोघेही रा. जय शंकर अपार्टमेंट, आंबेगाव पठार), राहुल अनिल सुलाखे (रा. साई अंगण सोसायटी, इंद्रायणीनगर), प्रशांत जयराम जगताप (वय ३५, रा. गोकुळनगर, कात्रज), पूजा रोहित जगताप (वय ३४, रा. कात्रज-कोंढवा रस्ता), मीनाक्षी कदम आणि धर्मेंद्र रामचंद्र सुतार (वय ४७, रा. वाहगाव, कराड) यांच्यावर दोषारोपपत्र दाखल करण्यात आले आहे.
याबाबत अशोक विठोबा वर्पे (वय ४७, रा. धनकवडी) यांनी सहकारनगर पोलिस ठाण्यात फिर्याद दिली आहे. त्यानुसार आरोपींवर गुन्हा दाखल करण्यात आला आहे. माधव कल्याण जगताप व कंपनीचे यापूर्वीचे कामगार राहुल अनिल सुलाखे, पूजा जगताप, मीनाक्षी कदम व धर्मेंद्र सुतार यांनी त्यांच्या पदाचा व अधिकाराचा गैरवापर व आपसांत संगनमत केली. फिर्यादी कार्यरत असलेल्या कंपनीच्या मालाची एका नामांकित कंपनीला विक्री न करता अन्य कंपन्यांना परस्पर विक्री केली. त्यातून आलेले ३१ लाख ८४ हजार ७६९ रुपये कंपनीच्या खात्यावर न भरता माधव जगताप याने स्वतः, पत्नी धनश्री जगताप व मित्र प्रशांत जगताप यांच्या खात्यावर ती रक्कम जमा करून कंपनीची फसवणूक केली.

कंपनीची ८० लाखांची फसवणूक
गुन्हा दाखल झाला, तेव्हा कंपनीची ३१ लाख ८४ हजार रुपयांची फसवणूक झाल्याचे नमूद करण्यात आले होते. पोलिसांनी केलेल्या तपासातून कंपनीची एकूण ८० लाख रुपयांची फसवणूक झाल्याचे समोर आले आहे. या गुन्ह्याचा तपास सहकारनगर पोलिस ठाण्याचे वरिष्ठ पोलिस निरीक्षक राहुल गौड करत आहेत.

‘‘गुन्हा दाखल होण्यापूर्वी कंपनीत कार्यरत असलेल्या कर्मचाऱ्यांनी संगनमत करून हा गुन्हा केला आहे. त्यातील सात आरोपींवर येथील जिल्हा न्यायालयात दोषारोपपत्र सादर करण्यात आले आहे. हे प्रकरण सध्या न्यायप्रविष्ट आहे.
-राहुल गौड, वरिष्ठ पोलिस निरीक्षक, सहकारनगर पोलिस ठाणे व तपास अधिकारी