सकाळ वृत्तसेवा
पुणे, ता. २७ : ग्राहकांना सुरळीत वीजपुरवठा देण्याच्या उपाययोजनांमध्ये कोणतीही हयगय करू नका. पश्चिम महाराष्ट्रात औद्योगिक वसाहतींसह सर्व भागात वीज वितरण यंत्रणेच्या विस्तारीकरण व सक्षमीकरणाची कामे वेगाने सुरू आहेत. त्यामुळे वारंवार वीज खंडित होणाऱ्या प्रकारांची गंभीर दखल घेण्यात येत आहे. वाढती थकबाकी कमी करण्यासाठी वीज बिलांच्या वसुलीला आणखी वेग द्यावा, अशा सूचना महावितरणचे अध्यक्ष व व्यवस्थापकीय संचालक लोकेश चंद्र यांनी दिले.

पुण्यासह कोल्हापूर व बारामती परिमंडलातील विविध योजनांच्या कामांची आढावा बैठक लोकेश चंद्र यांनी घेतली. त्यावेळी त्यांनी या सूचना दिल्या. यावेळी संचालक सचिन तालेवार, कार्यकारी संचालक प्रसाद रेशमे, धनंजय औंढेकर, पुणे प्रादेशिक संचालक सुनील काकडे, मुख्य अभियंता धर्मराज पेठकर व स्वप्नील काटकर उपस्थित होते.

महावितरणच्या महसूलवाढीसाठी नवीन ग्राहकांचे स्वागत करा. ग्राहकांशी समन्वय साधा. त्यांच्या अडचणी समजून घेत आवश्यक मदत करा. गेल्या काही दिवसांमध्ये वीजपुरवठा खंडित होण्याचे प्रमाण वाढले आहे. ही गंभीर बाब आहे. सुरळीत वीजपुरवठ्यासाठी ताबडतोब उपाययोजना कराव्यात. देखभाल व दुरुस्तीच्या कामांसाठी वीज बंद ठेवण्याचा कालावधी कमी करावा व संबंधित ग्राहकांना एसएमएसद्वारे पूर्वसूचना द्यावी. , असेही चंद्र म्हणाले. एप्रिलपासून वीजबिलांच्या थकबाकीमध्ये सातत्याने वाढ होत आहे. ही गंभीर बाब आहे. आर्थिक स्थैर्यासाठी वीजबिल वसूलीशिवाय पर्याय नाही. महसूल वाढ व वसूलीमध्ये हयगय केल्यास कारवाईला सामोरे जावे लागेल, असा इशाराही चंद्र यांनी यावेळी दिला.

वीजचोरीबाबत कारवाईची सूचना
पुणे प्रादेशिक विभागात वीजबिलांच्या थकबाकीमुळे १५ टक्के ग्राहकांचा वीजपुरवठा कायमस्वरूपी खंडित केला आहे. परिणामी वीजहानीत वाढ होत आहे. पुणे विभागात पुणे ग्रामीण मंडळाची वीज हानी ६.९४ टक्के आहे तर सोलापूर मंडळाची वीजहानी सर्वाधिक २८.३१ टक्के आहे. हे चित्र गंभीर आहे. प्रत्येक विभागात कायमस्वरूपी वीज खंडित असलेल्या वीजजोडण्यांची तपासणी करण्याची मोहीम सुरू करा. यासह वीजचोरी आढळल्यास त्वरित कारवाई करण्याचे आदेशही चंद्र यांनी दिले.