पुणे, ता. २७ : खराडी येथील एका उच्चभ्रू हॉटेलमध्ये सुरू असलेल्या रेव्ह पार्टीवर गुन्हे शाखेच्या अमली पदार्थविरोधी पथकाने रविवारी पहाटे छापा टाकला. या कारवाईत माजी मंत्री एकनाथ खडसे यांचा जावई प्रांजल खेवलकर यांच्यासह सात जणांना अटक करण्यात आली. त्यांच्या ताब्यातून कोकेन, गांजा, मोबाईल, मोटारी, हुक्का सेट आणि मद्याच्या बाटल्यांसह ४१ लाख ३५ हजार रुपयांचा मुद्देमाल जप्त करण्यात आला आहे.
प्रांजल मनीष खेवलकर (वय ४१, रा. इंद्रप्रस्थ सोसायटी, हडपसर), निखिल जेठानंद पोपटाणी (वय ३५, रा. डीएसके सुंदरबन, अमनोरा पार्कच्या पाठीमागे, माळवाडी), समीर फकीर महम्मद सय्यद (वय ४१, रा. हेरिटेज, पॅलेस ऑर्किड सोसायटी, एनआयबीएम रस्ता), सचिन सोनाजी भोंबे (वय ४२, रा. द्वारकानगर, वाघोली), श्रीपाद मोहन यादव (वय २७, रा. आनंदी सुंदर निवास, पंचतारानगर, आकुर्डी), ईशा देवज्योत सिंग (वय २२, रा. कुमार बिर्ला सोसायटी, नागरस रस्ता, औंध) आणि प्राची गोपाल शर्मा (वय २३, रा. गोदरेज ग्रीन सोसायटी, म्हाळुंगे) अशी अटक केलेल्या संशयितांची नावे आहेत.
गुन्हे शाखेचे पोलिस उपायुक्त निखिल पिंगळे यांनी रविवारी पत्रकार परिषदेत ही माहिती दिली. त्यांनी दिलेल्या माहितीनुसार, खराडी भागातील एका हॉटेलमधील खोलीत रेव्ह पार्टी सुरू असल्याची माहिती गुन्हे शाखेच्या अमली पदार्थविरोधी पथकाला मिळाली. त्यानुसार या पथकाने रविवारी पहाटे सव्वातीनच्या सुमारास स्टेबर्ड अझुर सूट हॉटेलमधील खोली क्रमांक १०२ मध्ये छापा टाकला. तेथे पाच पुरुष आणि दोन महिला पार्टी करताना आढळून आले. या पार्टीत अमली पदार्थ, मद्य आणि हुक्काचे सेवन केले जात असल्याचे आढळून आले. त्यांच्या ताब्यातून २.७० ग्रॅम कोकेन, ७० ग्रॅम गांजा, १० मोबाईल, दोन मोटारी, हुक्का सेट, मद्य आणि बिअरच्या बाटल्या असा मुद्देमाल जप्त केला आहे. याप्रकरणी खराडी पोलिस ठाण्यात एनडीपीएस ॲक्ट कलम ८ (क), २२(ब), ११ (अ), २१(ब), २७ कोटपा ७ (२), २०(२) अंतर्गत गुन्हा दाखल करण्यात आला आहे.
सर्व आरोपींना वैद्यकीय तपासणीसाठी ससून रुग्णालयात नेण्यात आले. त्यानंतर त्यांना दुपारी न्यायालयात हजर करण्यात आले. ससून रुग्णालयातून वैद्यकीय अहवाल अद्याप प्राप्त झालेला नाही. गुन्हे शाखेचे अतिरिक्त पोलिस आयुक्त पंकज देशमुख, पोलिस उपायुक्त निखिल पिंगळे आणि सहाय्यक आयुक्त राजेंद्र मुळीक यांच्या मार्गदर्शनाखाली पोलिस निरीक्षक कुंभार, सुदर्शन गायकवाड, सहाय्यक निरीक्षक राजेश माळेगावे, नितीनकुमार नाईक, पोलिस उपनिरीक्षक अस्मिता लाड यांच्यासह पथकातील कर्मचाऱ्यांनी ही कारवाई केली.