पुणे, ता. २७ : पिकांचे नुकसान टाळण्यासाठी भरपावसामध्ये दीड किलोमीटर अंतरावर विजेचा लोखंडी खांब कामगारांनी वाहून नेत पाच दिवसांपासून खंडित असलेला वीजपुरवठा रविवारी दुपारी सुरळीत केला.
वेल्हे तालुक्यातील वेल्हा बुद्रूक या गावातील ५५ ग्राहकांचा वीजपुरवठा खांब तुटल्यामुळे खंडित झाला होता. वीजपुरवठा सुरळीत करण्यासाठी नागरिकांकडून पाठपुरावा सुरू होता. परंतु काम अवघड होते. त्यासाठी ठेकेदाराची मदत घेऊन संततधार पाऊस व जोराच्या वाऱ्यामुळे काम करणे अवघड जात होते. मात्र कामगारांनी लोखंडी खांब अंगाखांद्यावर वाहून नेला. तसेच तो उभा करताना भात पिकांचे नुकसान होणार नाही, याचीही काळजी घेतली. खांब उभा करून तारा ओढून घेतल्यावर वीजपुरवठा सुरळीत करण्यात आला. त्यामुळे पाच दिवसांपासून अंधारात असलेला हा भाग विजेने पुन्हा उजळून निघाला आहे.