पुणे, ता. २७ ः नॉर्थ अमेरिकन फिल्म असोसिएशनतर्फे (नाफा) अमेरिकेतील सॅन होजे येथील ‘द कॅलिफोर्निया थिएटर’ येथे पुरस्कार सोहळ्याचे आयोजन करण्यात आले होते. यावेळी ज्येष्ठ अभिनेते अमोल पालेकर यांना नाफा जीवनगौरव पुरस्काराने सन्मानित करण्यात आले.
यावेळी राज्याचे सांस्कृतिक कार्यमंत्री ॲड. आशिष शेलार, ‘नाफा’चे संस्थापक अभिजित घोलप यांच्यासह मराठी चित्रपट क्षेत्रातील अनेक कलाकार उपस्थित होते. पुरस्काराला उत्तर देताना पालेकर म्हणाले, ‘‘काही वर्षांपूर्वी निकोल किडमन आणि अमिताभ बच्चन यांना घेऊन मराठी चित्रपट करण्याचे स्वप्न होते पण हॉलिवूड स्टुडिओचा समावेश करण्याच्या निकोल यांच्या अटीमुळे तो प्रकल्प थांबवावा लागला. त्यावेळी ‘नाफा’सारखी संस्था असती, तर ते स्वप्न पूर्ण झाले असते. मात्र आता अशी स्वप्ने पूर्ण होतील, अशी आशा आहे.’’
यावेळी दिग्दर्शक-निर्माते मधुर भांडारकर, ज्येष्ठ अभिनेते डॉ. मोहन आगाशे, महेश कोठारे, सचिन खेडेकर, अश्विनी भावे, सोनाली कुलकर्णी, स्वप्नील जोशी, आदिनाथ कोठारे, वैदेही परशुरामी आदी कलाकारांचा विशेष गौरव करण्यात आला. तसेच, विविध मनोरंजनपर कार्यक्रम यावेळी सादर झाले. या कार्यक्रमात मराठी लोकनृत्यांचे सादरीकरणही करण्यात आले. अवधूत गुप्ते यांनी सादर केलेल्या ‘बाई बाई मनमोराचा’ आणि ‘आयुष्य हे’ या गीतांना दाद मिळाली.

फोटोः 34999