पुणे, ता. २८ : ‘महाराष्ट्र आपत्कालीन वैद्यकीय सेवा (एमईएमएस) १०८ डॉक्टर्स असोसिएशन’च्या आपत्कालीन वैद्यकीय सेवा अधिकाऱ्यांनी (इएमएसओ) विविध मागण्यांची पूर्तता न केल्‍यास तीव्र आंदोलन छेडण्याचा इशारा दिला आहे. बीव्‍हीजी इंडिया लिमिटेड, सुमीत फॅसिलिटीज व एसएसजी प्रा. लि. या ठेका घेणाऱ्या कंपन्यांकडून आर्थिक, सामाजिक व मानसिक शोषण होत असल्‍याचा आरोप करत मागण्या तातडीने मान्य न केल्यास तीव्र आंदोलन करण्‍याचा इशारा संस्थेचे सरचिटणीस डॉ. विश्वनाथ काकडे यांनी सोमवारी (ता. २८) पत्रकार परिषदेत दिला.

काकडे म्‍हणाले की, या सेवा अधिकाऱ्यांना गेल्या ११ वर्षांपासून ८ तासांच्या कामासाठी केवळ २२ हजार इतके मानधन मिळते. त्‍यामध्‍ये वाढ न देणे, सवेतन रजा नसणे व त्‍याचबरोबर ‘समान काम, समान वेतन’ या धोरणाची अंमलबजावणी केली जात नाही. कंपन्‍यांकडून ६० हजार प्रतिमाह वेतन (रीटेनरशिप फी) द्यावे, त्यात वार्षिक वाढ मिळावी, असंवैधानिक कपात करू नये, अधिक वेळ काम केल्यास त्याचे अतिरिक्‍त पैसे मिळावे, या मागण्‍या मांडल्‍या. तसेच आरोग्य व इतर विमा, प्रत्येक कर्मचाऱ्याचा काढावा, रुग्णवाहिकांमधून शव वाहून नेण्याची सक्ती बंद करावी, आदी मागण्या केल्‍या आहेत. या मागण्या लवकरात लवकर पूर्ण कराव्यात, असे आवाहन देखील संघटनेतर्फे केले आहे.