पुणे, ता. २९ : ‘‘कुटुंबात सकारात्मक वातावरण गरजेचे असून मुलांसमोर पालकांनी वाद टाळायला हवेत. कितीही राग आला तरीही मुलांवर न चिडता, त्यांना समजावून सांगायला हवे,’’ असे मत प्रा. शैलजा सांगळे यांनी दिला.
‘तनिष्का व्यासपीठा’तर्फे धारेश्वर विद्या व क्रीडा प्रतिष्ठान येथे तनिष्का सदस्यांसाठी ‘सुजाण पालकत्व’ हा कार्यक्रम उत्साहात झाला, त्यावेळी त्या बोलत होत्या. याप्रसंगी संस्थेचे अध्यक्ष काका चव्हाण, संचालक अनिकेत चव्हाण, तनिष्का गटप्रमुख सुनीता चव्हाण, हर्षदा चव्हाण, सदस्य रूपाली रायकर, पल्लवी पवार, अंजली पवळे, आरती पांगारे, कविता जाधव, मनाली कोठारी, सारिका पोकळे आदी उपस्थित होते.
सांगळे म्हणाल्या, ‘‘मुलांची इतरांशी तुलना करू नका. प्रत्येक मूल वेगळे असते. आपल्या मुलातील विशेष गुण ओळखून त्यांची स्वप्ने पूर्ण करण्यासाठी, त्यांना मदत करण्यासाठी पालकांनी प्रयत्न करायला हवेत. आपल्या पाल्यांसाठी आश्वासक आधार बनणे गरजेचे आहे.’’
प्रास्ताविक जागृती कुलकर्णी यांनी केली. हर्षदा चव्हाण यांनी आभार मानले.