पुणे, ता. ३१ : वैकुंठ मेहता राष्ट्रीय सहकारी व्यवस्थापन संस्थेला (वॅम्निकॉम) गुजरातमधील त्रिभुवन सहकार विद्यापीठाची मान्यता मिळाली आहे. विद्यापीठाची मान्यता मिळालेली ही देशातील पहिली सहकार संस्था आहे. संस्थेतील चार विविध प्रकारचे अभ्यासक्रम त्रिभुवन विद्यापीठाअंतर्गत चालविले जाणार आहेत.

पारंपरिक अभ्यासक्रमासोबतच आधुनिक डिजिटल तंत्रज्ञानाच्या सहकारातील वापरासंबंधीचे अभ्यासक्रम आता या संस्थेत शिकवले जातील. यामुळे युवकांसाठी विशेषतः ग्रामीण भागातील युवकांसाठी करिअरचे नवे दालन खुले होत आहे, अशी माहिती केंद्रीय सहकार राज्यमंत्री मुरलीधर मोहोळ यांनी दिली.

मोहोळ म्हणाले, ‘‘या विद्यापीठामुळे पुण्यातील ‘वॅम्निकॉम’चे महत्त्व कमी होणार असल्याची टीका सहकार क्षेत्रातील तज्ज्ञांनी केली होती. मात्र, या विद्यापीठात ही संस्था अविभाज्य घटक असेल.’’

सहकारविषयक पूर्ण शैक्षणिक काम...
वैकुंठ मेहता संस्थेच्या वतीने सध्या कृषी व्यवसाय व्यवस्थापनाची दोन वर्षांची पदव्युत्तर-पदविका, सहकार विषयातील दोन वर्षांची पदव्युत्तर-पदविका, सहकारी बँकिंग आणि वित्त विषयातील चार वर्षांची व्यवसाय प्रशासन पदवी आणि सहकार व्यवसाय व्यवस्थापनाचा नऊ महिन्यांचा पदविका अभ्यासक्रम सुरू आहे. त्रिभुवन सहकार विद्यापीठाची या संस्थेला मान्यता मिळाल्याने सहकारविषयक पूर्ण शैक्षणिक काम या संस्थेला करता येईल. तसेच येथे शिकणाऱ्या सर्वांना अधिकृत विद्यापीठाची पदवी, पदविका किंवा प्रमाणपत्र मिळणार आहे.