प्रा. विभावरी चतुर यांना पीएच.डी. प्रदान
पुणे, ता. १ : औंध येथील प्रा. विभावरी चतुर यांना सावित्रीबाई फुले पुणे विद्यापीठाने औषधनिर्माण शास्त्र विषयातील पीएच.डी. फार्मास्युटिकल पदवी प्रदान केली आहे. ‘डिझाईन अँड डेव्हलपमेंट ऑफ निओसोमल ड्रग डिलीव्हरी सिस्टीम’ हा त्यांच्या संशोधनाचा विषय होता. मॉडर्न कॉलेज ऑफ फार्मसीचे प्राचार्य प्रा. डॉ. राज्ञीकांत ढोले यांनी मार्गदर्शन केले. प्रा. चतुर यांनी संशोधना दरम्यान दोन पेटंट प्राप्त केले आहेत. तसेच सहा आंतरराष्ट्रीय रिसर्च पेपर्स आणि एक बुक चॅप्टर प्रकाशित केले आहे.

रोटरी क्लब फॉरच्यूनच्या अध्यक्षपदी अॅड. तोष्णीवाल
पुणे, ता. ३१ : रोटरी क्लब फॉरच्यूनच्या अध्यक्षपदी अॅड. शिल्पा तोष्णीवाल यांची नियुक्ती केली. त्यांनी मावळते अध्यक्ष शिरीष प्रभू यांच्याकडून सूत्रे स्वीकारली. तसेच प्रिया देशपांडे यांची निवड सचिवपदी करण्यात आली. यावेळी नियोजित प्रांतपाल नितीन ढमाले, संस्थापक अध्यक्ष डॉ. दीपक तोष्णीवाल, रोटरी पदाधिकारी, सदस्य व कुटुंबीय उपस्थित होते. तोष्णीवाल यांनी आगामी काळात पर्यावरण, शिक्षण, आरोग्य आदींविषयी विविध समाजोपयोगी प्रकल्प राबविणार असल्याचे सांगितले.

कायदेविषयक सल्ला केंद्र सुरू
पुणे, ता. ३१ : पर्वतीतील अखिल भारतीय मराठा शिक्षण परिषदेचे यशवंतराव चव्हाण विधी महाविद्यालयाच्या वतीने गरजू व इच्छुक व्यक्तींसाठी मोफत कायदेविषयक सल्ला केंद्र महाविद्यालयात सुरु केले आहे. हे केंद्र दर मंगळवारी, गुरुवारी व शनिवारी दुपारी १२ ते २ दरम्यान खुले राहील. अशी माहिती प्राचार्य डॉ. शुभदा घोलप यांनी दिली.