पुणे, ता. १ ः दीक्षित जीवनशैलीच्या माध्यमातून नागरिकांना वजन कमी करण्यासाठी आणि औषधांवाचून मधुमेहावर नियंत्रण प्राप्त करण्यासाठी मार्गदर्शन करणाऱ्या असोसिएशन फॉर डायबेटिस अँड ओबेसिटी रिव्हर्सल (अडोर) या संस्थेचे मधुमेहमुक्ती समुपदेशन केंद्र आता विधी महाविद्यालय रस्त्यावर महिंद्रा उन्नती शोरूमच्या वरील प्रशस्त जागेत स्थलांतरित झाले आहे.
हे केंद्र सोमवार ते शनिवार सायंकाळी ५ ते ९ या वेळेत सुरू राहणार असून, या केंद्राच्या माध्यमातून देण्यात येणाऱ्या वैद्यकीय तपासण्या व समुपदेशन या सेवा पूर्णतः निःशुल्क असतील, अशी माहिती ज्येष्ठ मधुमेह उपचारतज्ज्ञ व दीक्षित आहारपद्धतीचे प्रणेते डॉ. जगन्नाथ दीक्षित यांनी गुरुवारी पत्रकार परिषदेत दिली. संस्थेचे विश्वस्त बाळासाहेब कदम, डॉ. जयंत नवरंगे आणि डॉ. वेदा नलावडे हे या वेळी उपस्थित होते. ही जागा राम पद्मा गोडबोले फाउंडेशन या सेवाभावी संस्थेने उपलब्ध करून दिल्याचे दीक्षित यांनी सांगितले.
‘‘मधुमेह मुक्ती समुपदेशन केंद्राद्वारे आजवर तीन हजार पाचशे रुग्णांनी वजन कमी करण्यासाठी किंवा मधुमेह नियंत्रणात आणण्यासाठी नावनोंदणी केली आहे. सहा महिन्यांत रुग्णांचे वजन हे सरासरी ६.२ किलोंनी कमी झाले आहे, तसेच सुमारे ३९८ मधुमेही रुग्णांचे ‘एचबीएवनसी’ किमान तीन महिन्यांपासून औषधे बंद होऊन ६.५ पेक्षा कमी झाले आहे,’’ अशी माहिती डॉ. दीक्षित यांनी दिली.