पुणे, ता. २ : यवत येथील दोन गटांमधील निर्माण झालेला वाद हा पूर्वनियोजित कटाचा भाग असून, राज्य सरकारने कायदा व सुव्यवस्था अबाधित ठेवण्यासाठी संबंधितांवर तत्काळ कठोर कारवाई करावी, तसेच प्रक्षोभक भाषण करणाऱ्या नेत्यांविरुद्ध कारवाई करावी, अशी मागणी नॅशनल कॉन्फरन्स फॉर मायनॉरिटीच्या वतीने जिल्हाधिकाऱ्यांना निवेदनाद्वारे करण्यात आली.
राहुल डंबाळे, डॉ. सिद्धार्थ धेंडे, सलीम पटेल, शहाबुद्दीन शेख, आसिफ खान, जावेद शेख यांच्यासह अन्य पदाधिकाऱ्यांनी जिल्हाधिकाऱ्यांची भेट घेऊन यवत येथील घटनेचा निषेध नोंदवला. समाजात आपापसांत विरोधी वातावरण पसरवण्याचा अजेंडा राज्यात काही जण राबवत आहेत. त्यामुळे राज्य सरकारने प्रक्षोभक भाषण करणाऱ्या नेत्यांच्या सभांवर बंदी आणावी, अशी मागणी संघटनेने केली, तसेच नागरिकांनी कोणत्याही अफवांवर विश्वास न ठेवता शांतता ठेवावी, असे आवाहनही करण्यात आले.