पुणे, ता. २ : शहरातील आदर फाउंडेशन आणि इंडियन मेडिकल असोसिएशन (आयएमए) यांच्या संयुक्त विद्यमाने ‘संजीवनी’ उपक्रम सुरू करण्यात आला आहे. गणेशोत्सवात सहभागी होणारे वैद्यकीय विद्यार्थी आणि ढोल-ताशा वादकांसाठी प्राथमिक जीवनरक्षक तंत्रज्ञानाचे प्रशिक्षण या उपक्रमात देण्यात येणार आहे.
गेल्या वर्षी गणेश विसर्जन मिरवणुकीदरम्यान कुमठेकर रस्त्यावर एका व्‍यक्‍तीला हृदयविकाराचा झटका आला होता. त्या वेळी वैद्यकीय विद्यार्थी व ताशावादक स्वानंद पाटील यांनी प्रसंगावधान दाखवून त्‍या नागरिकाला सीपीआर (जीवरक्षक प्रणाली उपचार) देऊन प्राण वाचवले. या घटनेच्या पार्श्वभूमीवर प्रशिक्षणात सीपीआर देणे, अचेतावस्था, दमा, फिटसारख्या आपत्कालीन स्थितींसाठी प्राथमिक उपचार शिकवले जातील. प्रशिक्षित स्वयंसेवक यंदाच्या विसर्जन मिरवणुकीत लक्ष्मी रस्ता, कुमठेकर रस्ता, टिळक रस्ता येथे मदतीसाठी असतील. ही कार्यशाळा रविवारी (ता. ३) कोथरूडमध्ये आणि २४ ऑगस्टला सहकारनगरमध्ये आयोजित केली आहे. उपक्रमाच्या माध्यमातून आपत्कालीन प्रसंगी तत्काळ मदत करण्यासाठी युवकांना सज्ज करणे हा उद्देश आहे.
याबाबत झालेल्‍या बैठकीला ‘आयएमए’चे अध्यक्ष डॉ. सुनील इंगळे, सचिव डॉ. रणजित घाटगे, डॉ. अंजली साबणे तसेच आदर फाउंडेशनचे अध्यक्ष स्वानंद पाटील, सचिव तन्वी केळकर आणि खजिनदार अथर्व परांजपे हे उपस्थित होते.