महिलांची सुरक्षा हीच खरी संस्कृतीची ओळख
स्री आधार केंद्राच्या कार्यशाळेत डॉ. नीलम गोऱ्हे यांचे प्रतिपादन
पुणे, ता. २ ः ‘‘गणेशोत्सव हा महाराष्ट्राच्या संस्कृतीचा आत्मा आहे. मात्र, सार्वजनिक गर्दीत महिलांची सुरक्षितता ही सर्वोच्च प्राथमिकता असायला हवी. त्यातून आपल्या संस्कृतीची ओळख पटते. स्वयंसेवकांची उपस्थिती महिला, मुली आणि लहान मुलांसाठी खूप आश्वासक असेल, असे प्रतिपादन स्त्री आधार केंद्राच्या अध्यक्षा आणि विधान परिषदेच्या उपसभापती डॉ. नीलम गोऱ्हे यांनी केले.
डॉ. गोऱ्हे यांच्या अध्यक्षतेखाली पुण्यामध्ये महिलांच्या सुरक्षिततेसंदर्भात एक महत्त्वपूर्ण प्रशिक्षण कार्यशाळा शनिवारी उत्साहात झाली. सार्वजनिक सणांच्या वेळी महिलांना सुरक्षेची खात्री देण्यासाठी स्वयंसेवकांना कायद्याविषयी प्रशिक्षण देण्याचा हा २३ वा उपक्रम होता. या कार्यशाळेचा मुख्य उद्देश गणेशोत्सवासारख्या गर्दीच्या काळात महिला, मुली आणि लहान मुलांवर होणारे अत्याचार, छेडछाड, चोरी किंवा लहान मुलांच्या अपहरणासारख्या घटनांना आळा घालण्यासाठी महिला कार्यकर्त्यांना प्रशिक्षित करणे हा होता. या कार्यक्रमात पोलिस आणि आपत्ती व्यवस्थापनाच्या तज्ज्ञ अधिकाऱ्यांनी मार्गदर्शन केले. यावेळी २० पोलिस ठाणे येथील दक्षता समितीच्या महिलांनी सहभाग नोंदवला होता.
यावेळी, अप्पर पोलिस आयुक्त (गुन्हे) पंकज देशमुख यांनी ‘सण आणि महिला सुरक्षितता ः कायदेसंरक्षण यंत्रणा व समाजाची भूमिका’ या विषयावर संवाद साधला. ‘संवेदनशील प्रश्नांवर उपाय शोधताना स्त्री आधार केंद्राची भूमिका उल्लेखनीय असते,’ असे त्यांनी नमूद केले. बॉम्बस्फोट विरोधी पथकाचे वरिष्ठ पोलिस निरीक्षक पोपट येले यांनी स्फोटके आणि बॉम्बशोधक पथकाच्या जबाबदारीबद्दल माहिती दिली. आपत्ती व्यवस्थापनाचे प्रशिक्षक विवेक नायडू यांनी शहरी आपत्ती व्यवस्थापनावर मार्गदर्शन केले. स्त्री आधार केंद्राच्या विश्वस्त अपर्णा पाठक यांनी संस्थेच्या कार्याची माहिती दिली.
--------------
फोटो ः 36853