पुणे, ता. ३ : ‘‘स्थानिक पातळीवर एकल महिलांच्या समस्या सोडवण्यासाठी बालविकास प्रकल्प अधिकारी यांना संपर्क प्रमुख म्हणून जबाबदारी दिली जाईल, जिल्ह्यासाठी मुख्य कार्यकारी अधिकारी आणि जिल्हाधिकारी यांना जबाबदारी दिली जाईल. एकल महिलांच्या सर्वांगीण प्रगतीसाठी प्रशासनाने शाश्वत प्रयत्न करावेत,’’ अशा सूचना अपर मुख्य सचिव व्ही. राधा यांनी केले.

जिल्हा परिषदेत ‘एकल महिलांच्या विविध समस्या व त्यांवरील उपाय योजना’ याबाबत आयोजित बैठकीत त्या बोलत होत्या. यावेळी विभागीय आयुक्त डॉ. चंद्रकांत पुलकुंडवार, जिल्हा परिषदेचे मुख्य कार्यकारी अधिकारी गजानन पाटील, चैतन्य संस्थेच्या डॉ. सुधा कोठारी, अतिरिक्त मुख्य कार्यकारी अधिकारी डॉ. चंद्रकांत वाघमारे, प्रकल्प संचालक शालिनी कडू, उप मुख्य कार्यकारी अधिकारी श्रीकांत खरात, भूषण जोशी, जिल्हा कार्यक्रम अधिकारी जामसिंग गिरासे उपस्थित होते.

व्ही. राधा म्हणाल्या, ‘‘महिलांना विविध योजनांचा लाभ मिळवून देण्यासाठी लागणारी कागदपत्रे उपलब्ध व्हावीत यासाठी तसेच महिलांच्या सामाजिक समस्या सोडवण्यासाठी प्रशासनाने पुढील सहा महिन्यांत मोहीम राबवावी. एकल महिलांना कायदेविषयक सहकार्य करण्यासाठी तज्ज्ञ मार्गदर्शकांची नियुक्ती करावी. एकल महिलांना किंवा त्यांच्या वारसांना रोजगाराच्या संधी व स्वस्त व्याजदरात कर्ज उपलब्ध करून देण्यासाठी प्रयत्न करावेत. तसेच महिलांनी उत्पादित केलेल्या वस्तूंना बाजारपेठ उपलब्ध करून द्यावी.’’ डॉ. चंद्रकांत पुलकुंडवार, गजानन पाटील, डॉ. सुधा कोठारी यांनीही मनोगत व्यक्त केले.