पुणे, ता. ३ ः शिक्षणविवेक यांच्यातर्फे चौथी ते सहावीच्या मुलांसाठी आयोजित गंमतघरचे उद्‍घाटन राज्य साहित्य आणि संस्कृती मंडळाचे अध्यक्ष डॉ. सदानंद मोरे यांच्या हस्ते झाले.
कर्वे रस्त्यावरील स्वातंत्र्यवीर सावरकर अध्यासन केंद्राच्या सभागृहात झालेल्या या कार्यक्रमाला गंमतघरच्या प्रमुख मार्गदर्शक डॉ. अर्चना कुडतरकर, ज्येष्ठ लेखक राजीव तांबे आदी उपस्थित होते. डॉ. मोरे म्हणाले, ‘‘सर्वसामान्यांना भगवद् गीता कळावी, यासाठी अवघ्या सोळाव्या वर्षी ज्ञानेश्वरांनी ज्ञानेश्वरीच्या माध्यमातून भगवद् गीता सोप्या मराठी भाषेत उलगडली, तर छत्रपती शिवरायांनी देखील वयाच्या सोळाव्याच वर्षी पहिला किल्ला जिंकून स्वराज्याची मुहूर्तमेढ रोवली. या अर्थाने ज्ञानेश्वरांनी भाषिक, तर छत्रपती शिवरायांनी राजकीय स्वातंत्र्य मिळवून दिले.’’
तांबे म्हणाले, ‘‘मुलांना धारिष्ट्याने प्रश्न विचारता येतील, असे वातावरण घरी आणि शाळेत देखील असणे आवश्यक आहे. त्या प्रश्नांची योग्यवेळी योग्य उत्तरे मिळाली तर मुलांच्या मनातील प्रश्नांचे जंजाळ सोडवले जाते. या विचारातूनच गंमतघर ही संकल्पना अस्तित्वात आली आहे.’’

------------