पुणे, ता. ३ : ‘‘मशिदीवरील भोंग्यामुळे होणाऱ्या ध्वनी प्रदूषणाबाबत मुंबई उच्च न्यायालयाने आदेश दिले आहेत. या अनुषंगाने मुंबईच्या पोलिस आयुक्तांनी शहर भोंगेमुक्त करून दाखविले. पुणे पोलिस आयुक्तांनीही ते करून दाखवावे. पुणे शहर भोंगेमुक्त करण्याबाबत आपण आजपासून पाठपुरावा करणार आहोत,’’ अशी माहिती भाजपचे माजी खासदार किरीट सोमय्या यांनी दिली.
किरीट सोमय्या यांनी रविवारी (ता. ३) फरासखाना आणि विश्रामबाग पोलिस ठाण्यात संबंधित पोलिस अधिकाऱ्यांची भेट घेतली. त्यानंतर त्यांनी पत्रकारांशी संवाद साधला. सोमय्या म्हणाले, ‘‘उच्च न्यायालयाने जानेवारी २०२५ मध्ये मशिदीवरील अनधिकृत भोंग्यामुळे होणाऱ्या ध्वनी प्रदूषणाबाबत आदेश दिला आहे. या आदेशात ध्वनी मर्यादा ५० डेसिबलपेक्षा अधिक असू नये, असे म्हटले आहे. मुख्यमंत्री देवेंद्र फडणवीस यांनीही अनधिकृत भोंगे चालणार नाहीत, अशी घोषणा विधानसभेत केली आहे. अनधिकृत भोंग्यांमुळे ध्वनी प्रदूषण होत असून, छत्रपती संभाजीनगर आणि ठाणे शहरात ६० ते ७० टक्के भोंगे काढण्यात आले आहेत.
‘‘पुणे पोलिस आयुक्तांसह सर्व पोलिस ठाण्यांना उच्च न्यायालयाच्या आदेशाची कागदपत्रे पाठवली आहेत. मशिदीवरील भोंगे किंवा कोणताही उत्सव असो, ध्वनी प्रदूषण टाळण्यासाठी न्यायालयाच्या आदेशाचे पालन झाले पाहिजे. परंतु काही पोलिस अधिकाऱ्यांकडून कारवाई केली जात नाही,’’ असे त्यांनी नमूद केले. मुंबई आणि मालेगाव बॉम्बस्फोटातील आरोपींची निर्दोष मुक्तता झाली आहे. मग या स्फोटामागील नेमके आरोपी कोण, या प्रश्नावर सोमय्या म्हणाले, ‘‘याबाबत राज्य सरकार योग्य निर्णय घेईल.’’