विजेचा धक्का बसून
बांधकाम मजुराचा मृत्यू

पुणे, ता. ३ : नियोजित गृहप्रकल्पाच्या ठिकाणी उच्चदाब वीज वाहिनीचा धक्का लागून एका बांधकाम मजुराचा मृत्यू झाला. ही घटना हडपसर-सासवड रस्त्यावरील फुरसुंगी परिसरात घडली. पवन दित्या नायक (वय ३३, रा. मध्य प्रदेश) असे मृत बांधकाम मजुराचे नाव आहे. याबाबत पोलिस उपनिरीक्षक विनोद पवार यांनी फिर्याद दिली आहे. त्यानुसार संबंधित बांधकाम व्यावसायिक शेषराव मोहिते यांच्याविरुद्ध फुरसुंगी पोलिसांनी गुन्हा दाखल केला आहे. फुरसुंगीतील हरपळे वस्ती भागात एक गृहप्रकल्प उभारण्यात येत आहे. या ठिकाणी महावितरणचे उच्चदाब वीजवाहक मनोरे असून, जवळच बांधकाम सुरू होते. पवन नायक याच्या हातातील ओल्या बांबूचा संपर्क वीज वाहिनीशी झाला. विजेचा तीव्र धक्का बसल्याने त्याचा मृत्यू झाला.

तरुणावर हल्ला;
तिघांना अटक

पुणे, ता. ३ : मोटारीला पुढे जाण्यास जागा न दिल्याच्या कारणावरून तिघांनी एका तरुणावर धारदार शस्त्राने वार केल्याची घटना सेनापती बापट रस्त्यावरील वेताळबाबा चौकात घडली.
पृथ्वीराज कुमार नरवडे (वय १९, रा. भोसलेनगर, गणेशखिंड रस्ता) असे जखमी झालेल्या तरुणाचे नाव आहे. याप्रकरणी चतु:शृंगी पोलिसांनी तिघांना अटक केली आहे. महेश प्रमोद पवार (वय २९), रोहित अशोक धोत्रे (वय २४) आणि आकाश विलास कुसाळकर (वय ३४, रा. वडारवाडी) अशी अटक केलेल्यांची नावे आहेत.
पृथ्वीराज नरवडे हे शनिवारी (ता. २) दुपारी मोटारीने सेनापती बापट रस्त्यावरून जात होते. त्याच दरम्यान आरोपींची मोटार पाठीमागून आली. पुढे जाण्यास जागा न मिळाल्याने आरोपींनी पृथ्वीराजला शिवीगाळ केली. त्यानंतर या तिघांनी त्याच्या मोटारीचा पाठलाग करत वेताळबाबा चौकात गाठून तरुणाला गाडीतून ओढून काढले. आरोपीपैकी एकाने त्याच्या डोक्यावर तीक्ष्ण शस्त्राने वार केला. या हल्ल्यात पृथ्वीराज गंभीर जखमी झाला असून, त्याच्यावर रुग्णालयात उपचार सुरू आहेत.
------