पुणे, ता. ४ ः ‘‘मृत्युपत्र करणे म्हणजे कुटुंब कलह टाळण्याची मृत्यूनंतरची सुविधा कायद्याने दिली आहे, हे समजून घेतले पाहिजे. तोंडी मृत्युपत्र करण्याची मुभा रणांगणावर कर्तव्य पार पाडणाऱ्या सैनिकांना कायद्याने दिली आहे. मृत्युपत्र करणारा हा मृत्युपत्र नोटरी वकिलांकडे अथवा साध्या कागदावरदेखील करू शकतो, अशी माहिती ज्येष्ठ विधिज्ञ ॲड. व्ही. पी. शिंत्रे यांनी दिली.
‘अधिवक्ता परिषद पश्चिम महाराष्ट्र’, ‘जन अदालत संस्था’ आणि ‘टेबल स्पेस कमिटी हॉल’ यांनी संयुक्तपणे ‘मृत्युपत्र’ या विषयावर नुकतेच पुणे जिल्हा न्यायालयात व्याख्यानाचे आयोजन केले होते.
‘टेबल स्पेस हॉल’चे अध्यक्ष ॲड. अमर लांडगे यांच्या हस्ते ॲड. शिंत्रे यांचा यावेळी सन्मान करण्यात आला. ॲड. अशोक सूतावणे, ॲड. अमर लांडगे, ॲड. श्रीकांत पाटील, ॲड. उमेश पोकळे, ‘जन अदालत संस्थे’चे अध्यक्ष ॲड. सागर नेवसे आणि ॲड. गोयल यावेळी उपस्थित होते.
मृत्युपत्र हेच इच्छापत्र कसे असते. ते आयुष्याच्या कोणत्याही टप्प्यावर करता येते. इच्छापत्र दोन साक्षीदारांच्या उपस्थितीत करणे चांगले. तसेच इच्छापत्र करणाऱ्या व्यक्तीची मनःस्थिती आणि शारीरिक स्थिती योग्य आहे, असा वैद्यकीय दाखला जोडून केल्यास पुढे कायदेशीर अडचणी उभ्या राहत नाहीत. मृत्युपत्र दस्त करताना कोणतेही मुद्रांक शुल्क शासनाकडून आकारले जात नाही. हे मृत्युपत्र दुय्यम नोंदणी कार्यालयातच नोंदवावे, असे आवश्यक नाही, असे ॲड. शिंत्रे म्हणाले.