पुणे, ता. ४ : ‘‘प्रत्येकाने स्वतःच्या रोजच्या सवयींमध्ये शिस्तबद्धता आणून राष्ट्र निर्मितीसारख्या उच्च ध्येयासाठी आपल्याला जमेल त्याप्रमाणे सहभाग नोंदविला तरच विकसित भारताचे स्वप्न साकारताना आपला देश अनेक बाबतींमध्ये पूर्ण जगाला दिशा देणारी शक्ती बनू शकते,’’ असे मत ज्येष्ठ पत्रकार डॉ. उदय निरगुडकर यांनी व्यक्त केले.

एसएनडीटी महिला विद्यापीठातर्फे आयोजित ‘संस्कृता’ व्याख्यानमालेतर्गत एसएनडीटी होम सायन्स महाविद्यालयातर्फे ‘संस्कृता ते राष्ट्रनिर्माता, विद्यार्थिनींची विकसित भारताच्या निर्मितीतील भूमिका’ विषयावर डॉ. निरगुडकर यांचे व्याख्यान आयोजित करण्यात आले. या वेळी महाविद्यालयाचे प्राचार्य डॉ. गणेश चव्हाण, अधिसभा सदस्य डॉ. महेश कोलतामे आदी उपस्थित होते.

डॉ. निरगुडकर म्हणाले, ‘‘एखाद्या राष्ट्राची निर्मिती ही त्या राष्ट्रामधील मानवी संपदेची गुणवत्ता, त्या राष्ट्रामधील सामाजिक सांस्कृतिक वातावरण आणि लोकांचा राष्ट्रनिर्मितीमधील सहभाग, यावर अवलंबून असते.’’

कार्यक्रमाचे सूत्रसंचालन भैरवी पाटणकर यांनी केले.