पुणे, ता. ११ : ‘रामपर्व’ या अनोख्या सांगीतिक कार्यक्रमातून रामायणातील दुर्लक्षित प्रसंग आणि व्यक्तिरेखा उलगडल्या. या कार्यक्रमाचे आयोजन गांधर्व महाविद्यालय, पुणे आणि व्यक्ताव्यक्त, पुणे यांच्या संयुक्त विद्यमाने गांधर्व महाविद्यालयाच्या विष्णू विनायक स्वरमंदिरात केले होते. याप्रसंगी गांधर्व महाविद्यालयाचे प्राचार्य पं. प्रमोद मराठे, उपप्राचार्या परिणिता मराठे उपस्थित होते. ‘राम जानकी मिलन झाले’, ‘दशरथ राजा शरयूकाठी’, ‘खचणार नाही नाथा, मी वाट पाहताना’, ‘झेप घेतली हनुमंताने’ अशा विविध गीतांच्या सादरीकरणाने रसिक त्या प्रसंगांशी जणू एकरूप झाले. यातील काव्यरचना अमित गोखले यांनी रचल्या होत्या; संगीतकार हेमंत आठवले आणि जान्हवी गोखले यांनी त्या संगीतबद्ध केल्या होत्या. अमित गोखले यांनी निरुपणाद्वारे प्रसंगांची उकल केली. शुभदा आठवले, केदार तळणीकर, अवधूत धायगुडे, वेधा पोळ, प्राची भिडे, मेघना भावे यांनी साथसंगत केली.