पुणे, ता. १३ : ‘लिव्हर सिरोसिस’ व ‘पॅनक्रियाटायटीस’ झालेल्या ५५ वर्षांच्‍या रुग्णाला शस्त्रक्रियेचा सल्ला देण्यात आला होता. परंतु आयुर्वेदिक औषधांच्या उपचारामुळे शस्त्रक्रिया टळण्यास मदत झाली आहे. याबाबतचा वैद्य मल्हार नेसरी यांचा शोध निबंध आंतरराष्ट्रीय नियतकालिकात प्रसिद्ध झाला आहे.

युरोप मध्ये प्रकाशित होणारे ‘साउथ ईस्टर्न युरोपियन जर्नल ऑफ पब्लिक हेल्थ’ या आंतरराष्ट्रीय नियतकालिकात (संशोधन पत्रिका) याविषयीचा शोधनिबंध प्रसिद्ध झाला आहे. नियतकालिकात प्रसिद्ध झालेल्‍या माहितीनुसार, काही महिन्यांपूर्वी या ५५ वर्षीय रुग्णाला दीर्घ मद्यपानाचा इतिहास होता. त्‍याला यकृताच्या विकारामुळे कावीळ झाली होती. त्‍याला दोन महिन्‍यांसाठी आयुर्वेदिक औषधे दिली व रुग्णाला पथ्य पाळायला सांगितले. यामुळे त्‍याच्‍या लक्षणांमध्ये सुधारणा झाली होती. दरम्‍यान मद्यपान सूरू केल्‍यावर त्‍‍याने त्‍याला ‘लिव्हर सिरोसिस’ (यकृताचा गंभीर आजार, यकृताच्‍या निरोगी पेशींच्या जागी चट्टे तयार होणे) व ‘पॅनक्रियाटायटीस’ (स्वादुपिंडाला सूज येणे) हा आजार उद्‌भवला. पोटात पाणी जमा व्‍हायचे. रुग्णालयात दाखल करून काही तपासण्या केल्यानंतर त्‍यांना शस्त्रक्रिया करण्याचा सल्ला डॉक्‍टरांनी दिला होता.

विना शस्त्रक्रिया यावर काही उपचार करता येईल का, या शोधात रुग्णाने कोथरूडमधील मेधामृत आयुर्वेद चिकित्सालयास भेट दिली व तिथेच उपचार सुरू करण्याचा निर्णय घेतला. या क्लिनिकमध्ये वैद्य मल्हार नेसरी यांच्या मार्गदर्शनाखाली त्यांनी उपचार घेतले. दीड ते दोन महिन्यांच्या उपचारामुळे त्‍याची लक्षणे सुधारली व शस्त्रक्रिया पूर्णपणे टळली असल्‍याचे निदर्शनास आले, अशी माहिती वैद्य मल्‍हार नेसरी यांनी दिली.