पुणे, ता. १३ : पुणेकरांना गेल्या काही दिवसांपासून भेडसावत असलेल्या उकाड्यापासून रविवारी (ता. १३) काहीसा दिलासा मिळाला. शहरातील कमाल आणि किमान तापमानात सरासरी दोन अंश सेल्सिअसने घट झाली असून, ढगाळ वातावरणामुळे वातावरणात गारवा निर्माण झाला.
पुणे आणि परिसरात दिवसभर आकाशामध्ये ढगांची सतत वर्दळ होती. काही वेळा सूर्य ढगांच्या आड लपला होता. त्यामुळे दिवसभर हवामानात एक प्रकारची दमट आणि गडद छाया जाणवत होती. रविवारी शहरात कमाल तापमान ३८ अंश सेल्सिअस तर किमान तापमान २२ अंश सेल्सिअस इतके नोंदवले गेले. गेल्या दोन दिवसांत तापमानात झालेली ही घसरण पुणेकरांसाठी सुखद ठरली. विशेषतः सकाळी आणि रात्रीच्या वेळेस हवेत जाणवणारा गारवा उकाड्यापासून दिलासा देणारा ठरला. पुढील दोन ते तीन दिवस पुणे शहरात आकाश अंशतः ढगाळ राहण्याची शक्यता आहे. या कालावधीत तापमानात थोडीशी वाढ होऊ शकते, परंतु त्यानंतर पुन्हा कमाल तापमानात घट होऊन हवामान स्थिर राहण्याचा अंदाज भारतीय हवामानशास्त्र विभागाने वर्तविला आहे.
पुणे आणि परिसरात सोमवारी (ता. १४) कमाल तापमानात किंचित वाढ होणार असून, कमाल तापमान ३९ अंश सेल्सिअस इतके नोंदविले जाईल, तर किमान तापमान २२ अंश सेल्सिअस नोंदवले जाईल. आकाश मुख्यतः निरभ्र राहून दुपारी आणि सायंकाळी अंशतः ढगाळ राहण्याची शक्यता आहे, तर मंगळवारी (ता. १५) कमाल तापमान स्थिर राहणार असून, त्यानंतर दोन दिवसांनी गुरुवारी (ता. १७) कमाल तापमान ४० अंश सेल्सिअस नोंदविले जाण्याची शक्यता आहे. आकाश मुख्यतः निरभ्र राहण्याची शक्यता हवामानशास्त्र विभागाने वर्तविली आहे.