पुणे, ता. ४ ः ‘वंदे मातरम्’‌‍ या गीताला १५० वर्षे पूर्ण होत असल्यानिमित्त आणि बंकिमचंद्र चॅटर्जी यांच्या १३१व्या स्मृतीदिनानिमित्त ‘ऋषी बंकिमचंद्र स्मृती महोत्सवा’चे आयोजन करण्यात आले आहे. या महोत्सवांतर्गत ‘वंदे मातरम्’‌‍चा इतिहास मांडणाऱ्या तसेच नामवंत भारतीय चित्रकारांनी रेखाटलेल्या भारतमातेच्या चित्रांचे प्रदर्शन आयोजित करण्यात आले आहे.
हे प्रदर्शन मंगळवार (ता. ८) ते शनिवार (ता. १२) या कालावधीत सकाळी १० ते रात्री ८ या वेळेत बालगंधर्व कलादालनात सर्वांसाठी खुले असेल, अशी माहिती प्रदर्शनाचे संयोजक मकरंद केळकर आणि ‘वंदे मारतम्’‌‍चे अभ्यासक मिलिंद सबनीस यांनी शुक्रवारी पत्रकार परिषदेत दिली. याप्रसंगी रवींद्र सातपुते उपस्थित होते.
प्रदर्शनाचे उद्‍घाटन मंगळवारी सायंकाळी ५.३० वाजता खासदार डॉ. मेधा कुलकर्णी यांच्या हस्ते होणार असून ज्येष्ठ चित्रकार चंद्रशेखर जोशी, अनिल उपळेकर यावेळी उपस्थित असतील. या प्रदर्शनात रावबहादूर धुरंधर, दीनानाथ दलाल, रघुवीर मुळगावकर, अल्लाबक्ष, पं. श्रीपाद सातवळेकर, अवनींद्रनाथ ठाकूर, वासुदेव कामत, सुहास बहुळकर यांच्या मुद्रित चित्रांसह जि. भी. दीक्षित, अनिल उपळेकर, सचिन जोशी, गिरीश सहस्रबुद्धे, चंद्रशेखर जोशी यांची मूळ चित्रेही प्रदर्शनात मांडण्यात येणार आहेत.