पुणे, ता. १० : लोणी काळभोर येथील एमआयटी आर्ट, डिझाइन आणि टेक्नॉलॉजी विद्यापीठाला (एमआयटी-एडीटी) ‘नॅक’कडून (नॅशनल असेसमेंट ॲण्ड ॲक्रेडेशन काउन्सिल) ‘अ’ दर्जा मिळाला आहे. विद्यापीठाचे कुलगुरू प्रा. डॉ. राजेश एस. यांनी गुरुवारी (ता. १०) पत्रकार परिषदेत ही माहिती दिली.
यावेळी विद्यापीठाचे प्र. कुलगुरू डॉ. रामचंद्र पुजेरी, डॉ. मोहित दुबे, कुलसचिव डॉ. महेश चोपडे, डॉ. सुनीता कराड आदी उपस्थित होते. डॉ. राजेश एस. म्हणाले, ‘‘विद्यापीठाचे मूल्यांकन करण्यासाठी नॅक समितीने १० ते १२ फेब्रुवारी या काळात विद्यापीठाला भेट दिली. अध्ययन-अध्यापन प्रक्रिया, पायाभूत सुविधा, गुणवत्ता, संशोधन व व्यावसायिक कृतिशीलता, विद्यार्थ्यांचे नोकरी व व्यवसायाचे प्रमाण, समाजातील वंचित घटकांपर्यंत शिक्षण पोहोचविण्याचे प्रयत्न, अशा विविध निकषांवर आधारित मूल्यांकन करून समितीने विद्यापीठाला पाच वर्षांसाठी ‘अ’ दर्जा प्रदान केला.’’

क्यूएस विद्यापीठ क्रमवारीत मिळालेले मानांकन, ‘एनआयआरएफ’मध्ये मिळालेले मानांकन यासह आता ‘नॅक’ने दिलेला ‘अ’ दर्जा, या सर्व यशाने विद्यापीठाच्या नावलौकिकात मानाचा तुरा खोवला गेला आहे. ‘एमआयटी-एडीटी’ विद्यापीठाचे विद्यार्थी आज जगभर विविध क्षेत्रात कार्यरत आहेत. त्यांचे बहरलेले कर्तृत्व हीच विद्यापीठाच्या कार्याची खरी पावती आहे.
- प्रा. डॉ. मंगेश कराड, कार्याध्यक्ष, एमआयटी-एडीटी विद्यापीठ