पुणे, ता. ७ : महाराष्ट्रात एकूण लोकसंख्‍येपैकी साडेआठ टक्‍के लोकसंख्या मधुमेहाने प्रभावित आहे. मधुमेहाच्या औषधांचे आणि उपकरणांचे दर झपाट्याने वाढत असल्‍याने महाराष्ट्रातील अनेक कुटुंबे यावरील वाढत्या आरोग्य खर्चामुळे गरिबीच्या खाईत ढकलले जात आहेत, अशी माहिती ‘ब्लू सर्कल डायबेटिस फाउंडेशन’च्‍या नूपुर ललवाणी व स्‍नेहल नंदगवळी यांनी दिली.
आरोग्य हा प्रत्येक मानवाचा मूलभूत अधिकार आहे. प्रत्येक व्यक्तीला परवडणाऱ्या आणि दर्जेदार आरोग्यसेवेचा कोणत्‍याही आर्थिक संकटाशिवाय लाभ मिळायला हवा. परंतु इन्शुलिन, औषधे, रक्‍तातील साखरेच्या पातळीची नोंद ठेवणारी उपकरणे आणि डॉक्टरांच्या भेटी यांसाठी होणारा खर्च अनेक कुटुंबांसाठी मोठे आर्थिक ओझे बनले आहे. त्‍यातच अत्यावश्यक मधुमेहाच्या औषधांचे आणि उपकरणांचे दर झपाट्याने वाढत आहेत. या किंमतवाढीचा फटका विशेषतः गरीब आणि मध्यमवर्गीय कुटुंबांना बसला आहे. ज्यामुळे सतत रक्तातील साखर नियंत्रण करणे आर्थिकदृष्ट्या अवघड झाले आहे.
परिणामी, इन्शुलिन, औषधे आणि सेन्सरच्या वाढत्या किमतींमुळे अनियंत्रित मधुमेह होऊ शकतो. त्‍यामुळे हृदय, मूत्रपिंड, डोळे आणि इतर अवयवांवर परिणाम करू शकतो व परिणामी संपूर्ण राज्यावर मोठा आर्थिक आणि सामाजिक भार पडतो. यामुळे मधुमेह उपचार सर्वांसाठी सुलभ आणि परवडणारे बनवण्यासाठी ठोस उपाय शोधावेत व या औषधांच्‍या किमतींवर नियंत्रण आणायला हवे, अशी मागणी त्‍यांनी प्रसिध्‍दीपत्रकाद्वारे केली.