पुणे, ता. १ : ‘‘विद्युत अपघातात कर्मचारी किंवा कमावत्या व्यक्तींचा मृत्यू झाल्यास कधीही भरून न येणारे नुकसान होते. त्यामुळे महावितरणचे कर्मचारी तसेच नागरिकांनी विद्युत सुरक्षेबाबत कायम सतर्क राहावे. विद्युत सुरक्षेला सर्वोच्च प्राधान्य द्यावे,’’ असे आवाहन महावितरणचे संचालक (मानव संसाधन) राजेंद्र पवार यांनी रविवारी केले.

महावितरणच्या वर्धापनदिनानिमित्त आयोजित ‘विद्युत सुरक्षा सप्ताहा’निमित्त कर्मचारी तसेच शालेय विद्यार्थी व नागरिकांसाठी ऑनलाइन खुल्या प्रश्नमंजूषा पोर्टलचे उद्‌घाटन पवार यांच्या हस्ते झाले. त्यावेळी ते बोलत होते. पुणे प्रादेशिक संचालक भुजंग खंदारे, मुख्य अभियंता सुनील काकडे यावेळी उपस्थित होते.

पवार म्हणाले, ‘‘महावितरणच्या कर्मचाऱ्यांनी विद्युत सुरक्षेच्या नियमांचे पालन करावे. कोणत्याही परिस्थितीत विद्युत अपघाताचा धोका निर्माण होणार नाही याची काळजी घ्यावी. विद्युत सुरक्षेबाबत नागरिकांना अवगत करावे. त्यासाठी सातत्याने स्थानिक उपक्रम राबवा व नागरिकांशी संवाद साधा.’’

खुल्या प्रश्नमंजूषेला राज्यातून मोठा प्रतिसाद मिळाला आहे. विद्युत सुरक्षेच्या ऑनलाइन प्रश्नमंजूषेत रविवारी सायंकाळपर्यंत ५४ हजार ६५९ कर्मचारी, शालेय विद्यार्थी व नागरिकांनी सहभाग घेतला असून त्यांनी ऑनलाइन प्रमाणपत्रही मिळवले आहेत.