गावचे अर्थकारण

सुळकुड गावाचे अर्थकारण प्रामुख्याने ऊस शेती आणि दुग्ध व्यवसायावर आधारलेले आहे. गावात प्रति दिन दोन हजार ते अडीच हजार लिटरच्या आसपास दूध संकलन होऊन ते विविध संघांना पुरविण्यात येते. त्यातून शेतकऱ्यांना ताजे उत्पन्न मिळते. गावातील अनेक शेतकरी तांदूळ व्यापाऱ्यांपेक्षा थेट ग्राहकांना विक्री करण्याला प्राधान्य देतात. नातेवाईक, मित्रपरिवार यासह तोंडी प्रसिद्धीमुळे कायमस्वरूपी ग्राहकवर्ग तयार झाला आहे, या विक्री व्यवस्थेमुळे मध्यस्थांचा हस्तक्षेप कमी होऊन शेतकऱ्यांना अधिक चांगला दर मिळत असल्याचे भात उत्पादक गणेश कतगर यांनी सांगितले. भाताची काढणी झाल्यानंतर गावातील मिलमध्ये प्राथमिक प्रक्रिया होते. पॉलिशिंगसाठी शेजारील गावांतील राइस मिलचा वापर केला जातो. पॉलिश केलेला तांदूळ स्वच्छ पॅकिंग करून ग्राहकांना देण्यात येतो. वाण, गुणवत्ता आणि मागणीनुसार प्रति किलो ५० ते ७० रुपये दराने विक्री होते. सणासुदीच्या काळासह वर्षभर या तांदळाला चांगली मागणी असते.