सासुर्वेत आजपासून
श्रमसंस्कार शिबिर

रहिमतपूर, ता. १५ ः येथील सरदार बाबासाहेब माने महाविद्यालयाच्या राष्ट्रीय सेवा योजना विभागाचे विशेष श्रमसंस्कार शिबिर उद्या (मंगळवार) पासून सोमवार (ता. २२) या कालावधीत सासुर्वे (ता. कोरेगाव) येथे आयोजित केले आहे. याची माहिती कार्यक्रम अधिकारी प्रा. शिवाजी चव्हाण, प्रा. युवराज खरात यांनी दिली.
शिबिराचे उद्‍घाटन उद्या (मंगळवारी) सकाळी १० वाजता रहिमतपूर पोलिस ठाण्याचे सहाय्यक पोलिस निरीक्षक सचिन कांडगे यांच्या हस्ते होणार आहे. कार्यक्रमाचे अध्यक्षस्थान पंचक्रोशी शिक्षण मंडळाच्या अध्यक्षा चित्रलेखा माने- कदम भूषविणार आहेत. यावेळी महाविद्यालयाच्या प्राचार्या डॉ. भाग्यश्री जाधव, सासुर्वे ग्रामपंचायतीच्या सरपंच शुभांगी पवार, उपसरपंच अभिषेक मोरे यांसह विविध मान्यवरांची उपस्थिती लाभणार आहे.
शिबिरात विविध प्रबोधनपर व्याख्याने, सामाजिक उपक्रम, सांस्कृतिक कार्यक्रम, मोफत बाल चिकित्सा व मोफत औषध वाटप शिबिर, मोफत नेत्रचिकित्सा अल्पदरात चष्मा वाटप व मोफत मोतीबिंदू तपासणी, मोफत सर्वरोग निदान शिबिर, रक्तदान शिबिर अशा विविध शिबिरांचे, उपक्रमांचे आयोजन करण्यात आले आहे.
शिबिराचा समारोप मंगळवारी (ता. २२) सकाळी १० वाजता कोरेगाव पंचायत समितीच्या गटविकास अधिकारी सुप्रिया चव्हाण यांच्या प्रमुख उपस्थितीत होणार असून, कार्यक्रमाचे अध्यक्षस्थान माऊली एज्यु. केअरच्या डायरेक्टर प्रियंका कदम भूषविणार आहेत. यावेळी प्राचार्या डॉ. भाग्यश्री जाधव यासह सरपंच, उपसरपंच, सदस्य, विविध पदाधिकारी यांची प्रमुख उपस्थिती लाभणार आहे.
शिबिर काळात आयोजित केलेल्या विविध उपक्रमांचा लाभ युवक, ग्रामस्थ व महिलांनी घ्यावा, असे आवाहन संयोजकांनी केले आहे.

---------------------------------