सोमेश्वरनगर, ता. १० : उन्हाळ्याच्या सुट्टीत मोबाइल आणि टीव्हीच्या विळख्यात अडकण्याऐवजी वाणेवाडी (ता. बारामती) येथील ३५ ते ४० शालेय मुले दररोज दोन तास पुस्तकांचे वाचन करत आहेत. ‘साद संवाद ग्रुप’ने १ मे पासून सुरू केलेल्या या उपक्रमाला मुलांचा उत्स्फूर्त प्रतिसाद मिळत आहे.
‘साद संवाद ग्रुप’च्या वतीने वाणेवाडी येथील जिल्हा परिषद प्राथमिक शाळेत लोकसहभागातून सावित्रीबाई फुले यांच्या जयंतीदिनी ‘स्व. सिद्धांत जगताप बालवाचनालय’ सुरू करण्यात आले आहे. १ मे ते १० जून या कालावधीत सकाळी ९ ते ११ या वेळेत हे वाचनालय परिसरातील मुलांसाठी खुले ठेवण्यात आले आहे. वाणेवाडीसह मुरूम आणि करंजेपूल येथील मुलेही येथे वाचनासाठी येत आहेत. वाचनालयाची रचना मुलांच्या आवडीनुसार करण्यात आली असून, भिंतींवर आकर्षक चित्रे आणि हाताला येतील अशा उंचीवर पुस्तके ठेवण्यात आली आहेत.
सुमारे दोन हजार पुस्तकांच्या संग्रहातून मुले आपल्या आवडीचे पुस्तक निवडून शाळेच्या व्हरंड्यात किंवा झाडाखाली बसून वाचनाचा आनंद घेत आहेत. या उपक्रमात परिसरातील पुस्तकप्रेमीही सहभागी होत असून, ते मुलांना गोष्टी सांगणे किंवा अभिवाचन करून दाखवत आहेत. या उपक्रमाचे आता एका वाचन चळवळीत रूपांतर होत असून, आगामी काळात वाचलेल्या पुस्तकांवर आधारित विविध स्पर्धा घेण्याचा मानस संयोजकांनी व्यक्त केला आहे.