भारत पाटील यांच्यावर काळेतेल ओतल्या प्रकरणी पाच जण अटकेत

टेंभुर्णी, ता.१५ : अकोलेखुर्द येथील ॲड. पांडुरंग तोडकर यांना वाळू माफियांनी केलेल्या हल्ल्याप्रकरणी आरोपींवर कारवाई करा, या मागणीसाठी अकोलेखुर्द व फुटजवळगांव येथील ग्रामस्थांनी काढलेल्या टेंभुर्णी येथील मोर्चामध्ये छत्रपती शिवाजी महाराजांबाबत एकेरी उल्लेख केल्याच्या कारणावरून जिल्हा लेबर फेडरेशन माजी चेअरमन भारत पाटील यांच्या अंगावर काळे तेल ओतून, शिवीगाळ व जीवे मारण्याची धमकी दिली. रविवारी सकाळी साडेअकरा वाजण्याच्या सुमारास टेंभुर्णी-करमाळा रस्त्यावरील बायपास पुलानजीक एका हॉटेलमध्ये घडली. याप्रकरणी पाचजणांविरुद्ध टेंभुर्णी पोलिस ठाण्यात गुन्हा दाखल करण्यात आला असून सर्व आरोपींना अटक केली आहे.

या प्रकरणी अशुभाऊ सुदर्शन ढवळे (रा.अकलूज), ऋषीकेश किसन चव्हाण (रा.लवंग ता.माळशिरस), विजय देविदास पराडे (रा.संगम), कुमार राजाराम ढवळे (रा.तांबवे ता.माळशिरस) विकास विलास पवार (रा.बाभूळगाव ता.माळशिरस)यांच्याविरुद्ध टेंभुर्णी पोलिस ठाण्यात फिर्याद दाखल करण्यात आली आहे.
जिल्हा लेबर फेडरेशनचे चेअरमन भारत अंकुश पाटील सकाळी साडे अकरा वाजण्याच्या सुमारास टेंभुर्णीतील करमाळा रस्त्यावरील देवा हॉटेलजवळ आले होते. पत्रिका घेण्यासाठी जात असताना अचानक पाच जणांनी त्यांना अडवले. या वेळी ‘मोर्चा का काढला मोर्चामध्ये शिवाजी महाराजांचा एकेरी उल्लेख व अपशब्द का वापरले’ असा जाब विचारण्यात आला. यावेळी श्री. पाटील यांनी आपण कोणताही अपशब्द वापरलेला नसून चुकून काही बोलले गेले असल्यास माफी मागण्यास तयार असल्याचे सांगितले. तरीही संशयितांनी ''तू महाराजांबद्दल बोललास, तुला सोडणार नाही '' असे म्हणत त्यांच्यावर घाण काळे तेल त्यांच्या डोक्यावर व अंगावर ओतले. घटनेची माहिती मिळताच टेंभुर्णी पोलिसांनी संबंधित आरोपींना अटक केली.

टेंभुर्णी पोलिस ठाण्यात ठिय्या
भारत पाटील यांच्या अंगावर घाण तेल ओतल्याचे समजताच, अकोलेखुर्द व फुटजवळगाव येथील नागरिकांनी टेंभुर्णी पोलिस ठाण्यात गर्दी केली होती. वाळू माफियांवर कारवाई करा व आरोपींवर योग्य कलमान्वये गुन्हा दाखल करा, या मागणीसाठी हे नागरिक दिवसभर टेंभुर्णी पोलिस ठाण्यात ठिय्या देऊन थांबले होते. सायंकाळी पोलिस निरीक्षक नारायण पवार यांनी आरोपींवर योग्य कलमान्वये गुन्हा दाखल करून कठोर कारवाई करण्याचे आश्वासन दिल्याने ठिय्या आंदोलन मागे घेण्यात आले.