डेटिंगच्या आमिषाने तरुणाला
लुटणाऱ्या युवतीसह दोघांना अटक
खराडी, ता. ३ : डेटिंग ॲपच्या माध्यमातून तरुणाला लुटणाऱ्या एका तरुणीसह दोघांना गुन्हे शाखेच्या पोलिसांनी अटक केली. न्यायालयाने आरोपींना पोलिस कोठडी सुनावली. कविता ऊर्फ पूजा नवीनचंद्र भट्ट (वय २७, रा. उत्तराखंड, सध्या रा. मीरा रोड, मुंबई) आणि नितीश नवीनसिंग (वय २५, रा. लक्ष्मी पार्क, नागलोई, दिल्ली) अशी अटक केलेल्यांची नावे आहेत. आरोपींकडून दोन लाख ३६ हजार रुपयांचा मुद्देमाल जप्त करण्यात आला. फिर्यादीची आरोपींशी डेटिंग अॅपवर ओळख झाली. त्यांना डेटिंगसाठी खराडीतील एका हॉटेलमध्ये बोलावण्यात आले. तेथे बलात्काराचा खोटा गुन्हा दाखल करण्याची धमकी देत आरोपींनी फिर्यादीला मारहाण केली. त्यांच्या मोबाईलमधून ४० हजार रुपयांची रक्कम ट्रान्स्फर करून घेण्यात आली. त्यानंतर आरोपींनी मोबाईलही चोरून नेला. या प्रकरणी चंदननगर पोलिस ठाण्यात गुन्हा दाखल करण्यात आला. पुढील तपास पोलिस निरीक्षक (गुन्हे) मनीषा पाटील करीत आहेत.
-----