वडगाव शेरी, ता. २१ ः पंडित धीरेंद्र शास्त्री ऊर्फ बागेश्वर धाम महाराजांचा ‘दिव्य दरबार’ आणि ‘हनुमान कथा सत्संग’ दुसऱ्या दिवशी उत्साहात पार पडले. संपूर्ण पुणे जिल्ह्यातून आलेल्या हजारो भक्तांनी या पर्वणीचा लाभ घेतला.

पुण्यातील संगमवाडी येथे जगदीश मुळीक फाउंडेशनने आयोजित केलेल्या तीन दिवसीय सत्संगातील आज दुसरे पुष्प धीरेंद्र शास्त्री यांनी गुंफले. महाराष्ट्रातील संत आणि आध्यात्मिक परंपरा मोठी असल्याचे सांगत त्यांनी अनेक दाखले दिले. मनुष्य यशस्वी होऊन मोठा झाला, तरी त्याचे पाय कायम जमिनीवर असायला हवेत. जगण्याला कायम अध्यात्माची जोड द्यायला हवी, गुरूचा आदर्श आपल्यासमोर ठेवून त्याप्रमाणे जीवन जगले पाहिजे, असेही त्यांनी या वेळी नमूद केले.
‘रामकृष्ण हरी’च्या जयघोषात सत्संगाची सांगता झाली.