वाघोली, ता. १५ : हॉटेलच्या बाहेर बाटली फोडल्याच्या कारणावरून दोन ग्राहकांच्या डोक्यात बिअरची बाटली फोडून जखमी केले. ही घटना वाघोलीतील प्रियांकानगरी येथील एका हॉटेलमध्ये सोमवारी मध्यरात्री साडेबाराच्या सुमारास घडली. या प्रकरणी अफरोज तांबोळी (वय ३०, रा. मांजरी बुद्रूक) यांनी लोणीकंद पोलिस ठाण्यात फिर्याद दिली. त्यानुसार वैशाली ताकवणे, रोहित निंबाळकर याच्यासह अन्य दोघांविरुद्ध गुन्हा दाखल झाला. पोलिसांनी दिलेल्या माहितीनुसार, फिर्यादी अफरोज, त्याचा मावसभाऊ साजिद तांबोळी आणि मित्रांसमवेत वाघोलीतील द टेरेस हॉटेल येथे जेवण करण्यासाठी गेले होते. हॉटेलच्या बाहेर बाटली का फोडली? असे म्हणून चौघांनी काउंटरवर ठेवलेली बिअरची बाटली अफरोज आणि साजिदच्या डोक्यात फोडली, तसेच शिवीगाळ करून मारहाण केली.