कात्रज, ता. १४ : महागाईचा चटका सर्वसामान्यांना सगळीकडे बसत असताना आता दुधाच्या दरातही २ रुपयांनी वाढ होणार आहे. दूध उत्पादक व प्रक्रिया कल्याणकारी संघाच्या पुणे जिल्हा सहकारी दूध उत्पादक संघ मर्यादित, कात्रज डेअरीमध्ये झालेल्या बैठकीत हा निर्णय घेण्यात आला. या वेळी विविध सहकारीसह खासगी संघांचे ४७ प्रतिनिधी उपस्थित होते.
बैठकीत पनीरातील भेसळ रोखण्यासाठी जनजागृती करण्याबाबत चर्चा झाली. शेतकऱ्यांचे प्रलंबित अनुदान लवकरात लवकर देण्याबाबत शासनाकडे मागणी करण्याबाबत, अन्न व औषध प्रशासन मंत्री, अधिकारी व दुग्धविकास मंत्री यांची भेट घेऊन भेसळखोरांवर कडक कारवाईची मागणी करण्याबाबत चर्चा झाली. संघटनेचे अध्यक्ष गोपाळराव म्हस्के, मानद सचिव प्रकाश कुतवळ, संगमनेर दूध संघाचे अध्यक्ष रणजितसिंह देशमुख, श्रीपाद चितळे व पुणे जिल्हा संघाचे अध्यक्ष स्वप्नील ढमढेरे उपस्थित होते.

दोन रुपयांप्रमाणे दरवाढीचा निर्णय एक मताने झाला आहे. महागाईच्या पार्श्वभूमीवर दूध उत्पादक शेतकऱ्यांच्या हिताचा विचार करून हा निर्णय घेतला आहे. वाढीव दर हे १५ मार्चपासून लागू होतील.
- प्रकाश कुतवळ, मानद सचिव, दूध उत्पादक व प्रक्रिया कल्याणकारी संघ

सध्याचे दर- वाढीव दर
गाईचे दूध-५४ ते ५६ रुपये-५६ ते ५८ रुपये
म्हशीचे दूध-७० ते ७२ रुपये-७२ ते ७४ रुपये