खडकवासला, ता. ३१ : पुणे शहराला पाणीपुरवठा करणाऱ्या पानशेत, वरसगाव, टेमघर आणि खडकवासला या चारही धरणांमध्ये गेल्या १८ दिवसांत सुमारे दीड टीएमसी पाण्याची घट झाली आहे.
गेल्या २० दिवसांत धरण परिसरात पाऊस पडल्याची नोंद झाली आहे. त्यामुळे सुमारे अर्धा टीएमसी पाणीसाठ्यात वाढ झाली. खडकवासला धरण साखळीत १३ मे रोजी संध्याकाळी ५ वाजता ७.१४ टीएमसी पाणी शिल्लक होते तर आज ३१ मे रोजी सायंकाळी ५ वाजता‌ ५.६५ टीएमसी पाणीसाठा आहे. या १८ दिवसांच्या कालावधीत १.६० टीएमसी पाणी धरणातून कमी झाले आहे. त्याच कालावधीत १८ मे पर्यंत कालव्यातून पाणी सोडले जात होते. तसेच महापालिकेने पिण्याच्या गरजेसाठी यातील पाणी वापरले आहे. त्यामुळे पाण्याची घट झाली आहे. सध्याचा पाणीसाठा गेल्या वर्षापेक्षा थोडा अधिक आहे. ३१ मे २०२४ रोजी पाणीसाठा ५.१९ टीएमसी होता, तर यंदा तो ५.६५ टीएमसी इतका असून, सुमारे अर्धा टीएमसी पाणी अधिक साठले आहे, अशी माहिती खडकवासला पाटबंधारे विभागाने दिली.