कात्रज, ता. ११ : भारती विद्यापीठ पोलिस ठाण्याच्या पथकाकडून एका अल्पवयीन मुलाकडून गावठी बनावटीचा कट्टा व एक जिवंत काडतूस हस्तगत करण्यात आले आहे. वरिष्ठ पोलिस निरीक्षक राहुलकुमार खिलारे, पोलिस उपनिरीक्षक नीलेश मोकाशी व पोलिस अंमलदार मितेश चौसमोले, अमन चौधरी, सागर बगरे यांनी ही कारवाई केली.
पोलिसांनी दिलेल्या माहितीनुसार, तपासादरम्यान पोलिसांना गुप्त बातमीदारामार्फत माहिती मिळाली होती की, नॅन्सी लेक होम सोसायटीजवळील एका ठिकाणी एक जण गावठी बनावटीचा कट्टा घेऊन खरेदीदाराकडे जात आहे. पोलिसांनी तत्काळ सापळा रचून एका अल्पवयीन मुलाला ताब्यात घेत तपासणी केली असता त्याच्याकडे ५० हजार रुपये किमतीचा गावठी बनावटीचा कट्टा व एक जिवंत काडतूस मिळून आले. त्याच्याविरुद्ध भारती पोलिसांत गुन्हा दाखल केला असून, पुढील तपास सुरू आहे.